Алай вахтунда Болгариядин Самоков шегьерда кьуршахар кьунин жуьрейрай (азаддаказ ва грекринни римлуйрин) 21 йисал къведалди яшарин жегьилрин арада дуьньядин кIвенкIвечивал патал кьиле физвай акъажунра (абур 24-августдалди давам жеда) чи ватанэгьли, вичин ери-бине Хив райондин Цналдилай тир, Къазахстандин патай экъечIзавай Камил Куругълиева азаддаказ кьуршахар кьунай 92 кг-дин заланвал авайбурун арада гимишдин медаль къазанмишна.
Къейд авун лазим я хьи, финалдиз акъатдалди бягьсера К. Куругълиеваз америкави Коннор Мирасолу — 7:5, гурживи Теймураз Кочкиани — 12:2, ярумчух финалда азербайжанви Анар Жафарли 9:6 гьисабралди кумукьна. 19-августдин няниз кьиле фейи финалда Узбекистандай тир Шерзод Поеновахъ галаз бягьс, гьайиф хьи, са баллдин тафават аваз, 2:3 гьисабдалди акьалтIна, чи ватанэгьли гимишдин медалдиз лайихлу хьана.
РикIел хкин: К. Куругълиев дуьньядин (17 йисал къведалди яшда авайбурун арада) ва Азиядин (21 йисал къведалди яшда авайбурун арада) чемпионвилин тIварарин сагьиб я.
