И йикъара СтIал Сулейманан райондин Кьулан СтIалрин мектебдин майдандал, Россиядин Игит Радим Халикьован экуь къаматдиз бахшна, волейболдай XX турнир кьиле фена. Ам ачухуниз талукьарнавай шад мярекатда райондин кьиле авай ксари, Россиядин ФСБ-дин Дагъустанда авай сергьятар хуьдайбурун Управленидин ва спортдин сообществодин векилри иштиракна.
КIватI хьанвайбурухъ элкъвена, райондин кьил Саид Темирханова чими келимаяр лагьана. Турнир яргъалди рикIера амукьдай вакъиадиз элкъуьнихъ умудлувал къалурна. Спортди инсанрин арада дуствал мягькемарзавайди къейдна. Командайрихъ агалкьунар хьун алхишна.
— Гьуьрметлу дустар, къе чун, Игит Радим Халикьован экуь къаматдиз бахшна, волейболдай юбилейдинди тир XX турнир ачухун патал кIватI хьанва. Им чун патал кьилди са спортдин сувар туш, Ватан патал чан гайи, жуьрэтлувилин, вафалувилин ва ватанпересвилин чешне тир чи ватанэгьлидин экуь къамат рикIера хуьзвайди къалурунин лишанни я.
Р. Халикьован тIвар чи райондин ва уьлкведин тарихда гьамишалугъ кхьенва. Къуллугъдин везифаяр кьилиз акъуддайла къалурай игитвиляй (кьейидалай кьулухъ), ам Россиядин Игитвилин тIварцIиз лайихлу хьана.Адан дирибашвили руьгьдин мягькемвал къалурзава. Ахьтин игитрин женгинин адетар СВО-дин иштиракчийри давамарзава. Чна дамахзава абурун игитвилер чавай рикIера хуьз ва гележегдин несилрив агакьариз хьунал, — алава хъувуна ада.
Къизгъиндаказ ва итижлудаказ кьиле фейи къугъунрин нетижада Каспийскдин, Дербентдин ва Кьулан СтIалрин командайри кIвенкIвечи чкаяр кьуна. Абуруз кубокар, медалар, грамотаяр ва пулдин пишкешар гана. Хъсандиз къугъвай спортсменривни кьилдин пишкешар агакьна. Абурун арада ава: Марат Мегьамедов (Каспийск), Эмир Лукьманов (Кьулан СтIал), Арсен Гуьлмегьамедов (Дербент) ва Рустам Динмегьамедов (Каспийск).
Рагнеда Рамалданова
