ЦIийи ктабар

Дидедин ва лезги чIаларал кхьизвай агъулрин шаир Камалдин­ Агьмедов чи халкьдин арада­ маш­гьурбурукай сад я. Вичин 80 йис тамам жезвай цIинин йисни­ ам патал бегьерлуди хьанва, адан кьве цIийи ктаб акъатнава. Яшариз килиг тавуна, шаирди яратмишунин кIвалах давамарзавайди адан «Муьгьуьббатдин лувараллаз»­ кIва­тIал­дай аквазва. И ктабда чи шииратдал рикI алайбуруз фад­лай чизвай эсеррихъ галаз санал эхиримжи йисара кхьенвайбурни гьатнава. КIватIалда еке чка авторди, вичи кIватI хъувуна, къайдадиз гъанвай, лезги чIалаз элкъуьрнавай агъул халкьдин бендери-манийри кьунва.

Камалдин Агьмедова агъул чIалаз элкъуьрнавай Кьуьчхуьр Саидан шииррин «Руьгьдин вилер» ктабни акъатнава. Ктабдиз филологиядин илимрин доктор Ш.А. Мазанаева куьруь, амма маналу сифте гафни кхьенва. И ктаб акъатунни чи литературадин уьмуьрда кьетIен, фикир желбдай вакъиайрикай я.

Агъадихъ чна «Муьгьуьббатдин лувараллаз» ктабдай шиир гузва.

Муьгьуьббатдин лувараллаз

Заз ахварай акунай вун,

Акунай вун вацрал алаз.

Им вуч кар я чун къакъатун,

Вафалувал эбеди яз?

РикIи-рикI нез ала чилел,

Вахъ тамарзу хьана даим.

Ви фикирар закай ялда –

КIанивилин лишан я им.

Ангье кьве гъед, агатиз кIанз,

Алахънава вили цава.

А гъетер чи мурадар я,

Чпиз гьеле тахьай дава.

Заз ахварай акунай вун,

Акунай вун цавараллаз.

Зун ви патав физ акунай

Муьгьуьббатдин лувараллаз. 

Чи мухбир