18-октябрдиз «Ахты» спорткомплексда азаддиз кьуршахар кьунайни самбодай СССР-дин спортдин мастер Къурбан Агъаевич Агъаеван гьуьрметдай республикадин турнир кьиле тухвана. Турнирдин спонсорвал баркаллу хиневийри — Тельман ва Теюб Къафароври, Элиф Давудова ва Нияз Сурхаева, кьилин судьявал ахцегьви Тимур Къазиханова авуна. Адаз халкьарин арадин дережадин судья, якутви руш Юлия Бумбочкинади куьмекна. Секретарвилин везифаяр А. Гъаниеван школадин тренер Мугьаммад Гъаниева тамамарна.
Турнирда иштиракун патал Махачкъала, Каспийск, Дербент шегьеррин ва Кьиблепатан Дагъустандин саки вири районрин командайрик кваз 120 жегьил пагьливанар, гьакI судьяярни тренерар ва бязи пагьливанрин диде-бубаяр атанвай. Сейли мугьманар яз, турнирда РД-дин Гьукуматдин Председателдин заместитель Нариман Абдулмуталибова, РД-дин рекъемрин технологияр вилик тухунин рекьяй министр Юрий Гьамзатова, хуьруьн майишатдин министрдин сад лагьай заместитель Шарип Шарипова, ватанперес карчи Абдуселим Палчаева, азаддиз кьуршахар кьунай дуьньядин чемпион Шамил Мамедова, спортдин зурба тешкилатчи Асадулла Лачинова, Къурбан Агъаеван кIеви дустар тир Мурсал Абдулкеримова, Ибрагьим Парпачева, Камал Жалилова, пагьливандин мукьва-кьилийрини хуьруьнвийри ва гзаф масабуру иштиракна.
Акъажунар ачухунин серенжемдив Россиядинни Дагъустандин гимнияр ягъунилай ва Ахцегьрин искусствойрин школадин аялрин туьнт «Лезгинкадилай» эгечIна. Турнирдин кьилин мурад кьисайрик квай хьтин зурба пагьливан рикIел хкун, жегьилрин арада спортдин азаддиз кьуршахар кьунин жуьре гегьеншарун, абур сагълам уьмуьр тухунал желб авун, халкьарин арада дуствилин алакъаяр мягькемарун ва акьалтзавай несилдиз спортдин куьмекдалди ватанпересвилин тербия гун тир.
Спортдин сувар, адан иштиракчиярни тамашачияр ва атанвай мугьманар тебрикунин гаф рахуналди, «Ахцегь район» МР-дин кьил Абдул-Керим Палчаева ачухна.
— Спорт — им сагъламвал, Дагъустанда ислягьвал, халкьарин арада дуствал хуьнин замин я! Къе чна, Хинерин хуьр, Ахцегь район вири уьлкведиз машгьур авур зурба пагьливан Къурбан Агъаеван экуь къамат рикIел хкуналди, адан тIварунихъ Ахцегьа сифте яз республикадин акъажунар тешкилнава. Метлеблу и карда чи гъил кьаз атанвай багьа мугьманар тебрикиз, чун пара шад я. Халкьдин къулай ва таъмин гележег паталди тир чи кьил кутунрин, кIвалахрин тереф хуьзвай республикадин кьиле авайбур сагърай! Турнирда къуй къуватлуди гъалиб хьурай!
— Рагьметлу Къурбан халудиз кьетIен гьуьрмет авунин лишан яз, Ахцегьа республикадин дережадин турнир тешкилунай кьиле райондин регьбер Абдул-Керим Палчаев, и чIехи спорткомплексдин директор Сердер Моллалиев аваз куьн вири сагърай! Им чи районда, санлай Кьиблепатан Дагъустанда спортдин азаддиз кьуршахар кьунин хиле виликан машгьурвал арадал хкунин мягькем кам я, — лагьана анал гаф къачур Къ.Агъаеван хайи хтул, Дагмедакадемиядин кафедрадин заведующий, профессор Тельман Къафарова.
Къурбан Агъаев рикIел хкунин ва турнирдин иштиракчиярни мугьманар тебрикунин хуш келимаяр гьакI пагьливандин дуст Мурсал Абдулкеримова ва масабуруни лагьана.
Акъажунрин нетижада 1-чка Ахцегьрин жегьил пагьливанрин командади кьуна. 2 ва 3-чкаяр Белиждин ва Рутул райондин командайри пайна. 1, 2 ва 3-чкаяр кьур вири спортсменар Ахцегь райадминистрациядин ва спонсоррин патай талукь тир дережадин медалриз, гьуьрметдин грамотайриз, пулдин пишкешризни призриз лайихлу хьана. Иллаки къизгъин ва итижлу бягьсер Къурбан Агъаеван заланвилин (79 кг.) категориядай майдандал атай тежрибалу пагьливанри къалурна. 1-чка Ахцегьрин командадин патай экъечIай пагьливан Мурад Агьмедова къазанмишна. Адаз райадминистрациядин кьилин патай алава яз 50 агъзур манат пулдин пишкеш ва спонсоррин патай гьер гана.
ТIебии къуват ва кьисайрик квай хьтин бягьсерин алакьунар авай Къурбан 1937-йисуз Ахцегь райондин Хинерин хуьре чубандин хизанда дидедиз хьана. Хайи хуьруьн мектебда ва Ахцегьа школа-интернатда кIелна. 1937-йисалай Ахцегьа Абдулали Гъаниеван (акъажунрай Дагъустанда СССР-дин спортдин 1-мастер) гуьзчивилик кваз пешекар спортдал элячIна. Вичин вахтунда Дагъустанда азаддиз кьуршахар кьунайни самбодай адав агакьдай пагьливан авачир. 1960-йисуз Къурбана РСФСР-дин чемпионвилин ва 1964-йисуз анжах са Шоте Ломидзедиз кумукьуникди СССР-дин чемпионатдин гимишдин призёрвилин дережаяр къазанмишна. 1963-йисан 22-октябрдиз азаддиз кьуршахар кьунай РСФСР-динни Ирандин хкягъай командайрин арада кьиле фейи дуствилин турнирда Къурбан Агъаевни Ирандин кьисайрик квай хьтин зурба ва машгьур пагьливан (Олимпиададин чемпион, 3 сеферда дуьньядин чемпион, автобиографиядин тегьердин «Мазандаранский тигр» художественный фильмдин кьилин игит) Имам Али Хабибидихъ галаз гьасиррал экъечIна. Садавай сад кIаник кутаз тахьай и гуьруьшдилай кьулухъ абур уьмуьрлух вафалу дустар яз амукьна.
Дашдемир Шерифалиев
