Итиж артух жезва
Дагъустандин юкьван пешекарвилин образованидин идарайриз алай вахтунда 16 агъзурни 375 арза атанва, хабар гузва РД-дин образованидин ва илимдин министерстводин пресс-къуллугъди.
Абитуриентрин арада виридалайни машгьур хилерик здравоохраненидин ва информациядин технологийрин рекьяй пешекарвилер ква.
«Жегьилрин арада и терефрин машгьурвал артух хьуни жемиятдин къурулушри ва экономикадин хилери абуруз гузвай фикир гзаф хьанвайдан гьакъиндай шагьидвалзава: уьлкведин мулкунал рекъемрин къурулушар вилик тухуз жедай лап хъсан IT-пешекаррин ва медицинадин къуллугъчийрин игьтияжар къвердавай гзаф жезва», – къейдзава министерстводи.
РФ-дин просвещенидин министр Сергей Кравцова къейд авурвал, санлай къачурла, уьлкведа юкьван пешекарвилин образованидиз ийизвай итиж артух жезва.
«Къенин юкъуз чаз колледжрик экечIун патал садрани тахьай кьадар арзаяр агакьнава – саки 3,2 миллион. Им, алатай йисан гьа и вахтунив гекъигайла 500 агъзурдан гзаф кьадар я», – лагьана ада.
Лагьана кIанда хьи, 2026-2027-йис патал уьлкведин колледжра ва техникумра бюджетдин тахминан 880 агъзур чка тайинарнава – алатай йисандалай 30 агъзур чкадин гзаф. Абурукай 56 процентдилайни гзаф технический пешекарвилерал гьалтзава. Ида уьлкведин экономикадихъ кадрийрин жигьетдай авай игьтияждиз жаваб гузва.
Очный къайдада кIелун патал абитуриентар кьабулунин асул кампания 15-августдиз акьалтIда. Чпихъ азад чкаяр амай образованидин идарайри очный къайдада кIелун патал документар кьабулунин гьерекат 25-ноябрдалди давамарда, очно-заочный ва заочный къайдада – 1-декабрдалди.
РикIел хкин, алай йисуз уьлкведин вузриз инженервилин хилерай бюджетдин гьисабдай кьабулун патал 263,8 агъзур чка чара авунвай. Амма гьикьван жегьилар вузри кьабулнаватIа, тамам делилар гьелелиг малум туш.
Чи мухбир