Ирид мектеб ачухда
КӀелунин цӀийи йис алукьдалди, Дагъустанда цӀийи 7 мектеб ачухда, абуру санлай 3632 аялдиз кIелдай чкаяр таъминарда, хабар гузва РД-дин образованидин ва илимдин министерстводин пресс-къуллугъди.
ЦIийи мектебар республикадин жуьреба-жуьре шегьерра ва районра пайда жеда – Хасавюртда 14-нумрадин (1150 чка) школа ачухда, Хасавюрт районда - Пятилетка (300 чка), Байрамаул (604 чка) хуьрерин мектебар. Махачкъалада цIийи кьве мектебди кIвалах башламишда: «Ветеран» микрорайонда (604 чка) ва ЦӀийи Хушет поселокда (604 чка). Къарабудахкент райондин Какамахи хуьруьн аялар 220 чка авай цIийи мектебдиз фида.
Идалайни гъейри, бинедилай ремонт авурдалай кьулухъ 38 школади чпин ракӀарар ачухда. Абурукай 28 мектеб «Жегьилар ва аялар» ва «Хизан» милли проектрин сергьятра аваз ремонтнава, мад 10 – республикадин бюджетдин такьатрин гьисабдай.
Санлай къачурла, 1-сентябрдиз республикада 486 агъзурдалай виниз ученикар партайрихъ ацукьда, абурукай 46 агъзурдав агакьна – сад лагьай классриз кьабулнавайбур.
Идахъ галаз сад хьиз, идаради хабар гузвайвал, кьетӀен гьаларин нетижада зиянар хьанвай образованидин 130 объект гуьнгуьна хтунин кIвалахар кьиле тухузва. Абурукай 36 мектеб РФ-дин Гьукуматдин резервный фондунин гьисабдай арадал хкизва, гьа жергедай яз 29 школа – бинедилай ремонт авуналди ва 7 объектни ракьукай фад туькIуьриз жедай дараматар. Мад 27 объект – республикадин бюджетдин гьисабдай, 67 – чкадин ва маса бюджетралди къайдадиз хкизва. Къенин юкъуз 58 мектеб тамамдиз гьазур я.
Йисан эхирдалди республикадин Тарумовский ва Бабаюрт районра, санлай къачурла, 330 аялдиз чкаяр жедай кьве бахчани ачухун пландик ква.
РФ-дин просвещенидин министр Сергей Кравцова уьлкведин образованидин къурулуш кIелунин цӀийи йисаз гьазур тирдакай малумарна: санлай къачурла, 1-сентябрдиз вири уьлкведа партайрихъ 17,8 млн ученик ацукьда, абурукай 1,5 млн – сифтегьан классра кӀелдайбур. КIелунин 2026/27-йисуз 38 агъзур школа кардик акатда; цӀийи – 17 мектеб (15,469 чка) ва ремонт авурдалай кьулухъ 746 мектеб (345 агъзурдалай виниз чкаяр) ачухда.
Амина Муслимова