На родном

Инженердин шиирар

ЦIийи ктабар

ЭЯР – кIелзава чна «Мавел» издательстводи гуьрчегдиз акъуднавай, гъвечIи форматдин ктабдин сифте жилдинилай. Ам ахъаяйла, гъавурда акьазва: ЭЯР Ярмет Эфендиеван тахаллус я. Урус чIалал кхьенвай, шиирарни гьикаяяр ва таржумаяр гьатнавай «Заз куьн кIанда» ктаб.

КцIар районда дидедиз хьайи Ярмет Эфендиева жегьил девирда политехнический институт акьалтIарна, вири уьмуьрда Махачкъалада, ахпа са кьадар йисара Рязань шегьерда заводра инженервиле кIвалахна. Гьина ам хьанатIани, санал кIвалахайбурун, гьакI чидайбурун рикIел ам еке алакьунар авай пешекар ва тешкилатчи, масадакай хабар кьадай, герек чIавуз вичик умуд кутаз жедай инсан яз аламукьна. Яшар хьанвай ам исятда пенсияда ава, гьайиф хьи, сагъаламвилин месэлаярни арадал атанва. Амма руьгьдай аватзавач, вичиз гьамиша хас хьайивал, уьмуьрдал кьару яз яшамиш жезва.

Вичикай пешекар литератордикай хьиз садрани фикир авуначтIани, Ярмет Эфендиев патал литература уьмуьрда датIана рикI алай машгъулат хьана. Виликдай чаз ам лезги поэзиядай урус чIалаз таржума авунвай эсеррин автор яз чидай. Ада гъвечIи кIватIаларни чапнай. Анжах абур артух раиж ийиз алахъначир, вичиз мукьва ва вичи хьиз литература рикIелди кьабулзавай ксарив агакьарнай.

Чи гьуьрметлу автордин цIийи ктабда адан вичин шиир, гьикаяяр, абурухъ галаз санал Етим Эминан, СтIал Сулейманан шииррикайни Уильям Шекспиран сонетрикай са бязибурун таржумаяр гьатнава. Са шакни алачиз, Ярмет Эфендиеван «Заз куьн кIанда» чи кIелдайбуруз хъсан савкьат жеда. Агъадихъ адай кьве шиир лезги чIалаз элкъуьрна гузва.

* * *

Вуч тIвар гун за ваз? Бахт ва я бала,

Юргъадин марф ва я лал кьенвай йиф,

Гуьзел гатун югъ ва я цIун ялав,

АцIай сукIра ва я рикIин гьайиф?..

Вуч тIвар гайитIани, анжах заз жеда вун,

Есирда бахтунин эбеди гьатда зун.

Зулун марф

Нисинин сятдиз ракъин нурдин

Экв гузвай хъвер тушир зун патал.

РикI лагьайтIа, ванцел гьижрандин

Рахазвай, пар акьалдна хурал.