27-августдиз Махачкъалада, тарихдин «Россия — зи тарих» паркуна, Республикадин информатикадин муаллимрин съезд кьиле фида. Мярекат и тарс школайрин программайрик кутурдалай кьулухъ 40 йис тамам хьунихъ галаз алакъалу я, хабар гузва РД-дин образованидин ва илимдин министерстводи.
Къейдзавайвал, съезд информатикадин тарсар гузвай муаллимривай чпин тежрибадикай рахаз, пешекарвилин дережа хкажиз ва и рекье гьалтзавай хци месэлаяр веревирд ийиз жедай майдан жеда.
Мярекатдал информатикадин хиле кар алай пешекарар, гьа жергедай яз Анна Босовадин чирвилер гунин ва методикадин материалрин соавтор, «Яндекс.Учебникдин» академический директор Роман Левин ва «Яндекс Лицейдин» директор Александр Паволоцкий рахун гуьзлемишзава.
Съезддал гьакIни образованидин хиле тIебии тушир интеллект (ИИ) ишлемишунин, школайра программированидин рекьиз фикир гунин, алукьзавай кIелунин йисан ГИА-диз ва ЕГЭ-диз гьазур хьунин месэлаяр веревирдда. Идалайни гъейри, Дагъустандин гьар жуьре районрай ва шегьеррай (Къизлярдай, Каспийскдай, Махачкъаладай, Дербентдай) тир муаллимрин арада тежриба раижунихъ элкъуьрнавай мастер-классар кьиле тухуда.
Съезддин тешкилатчийрин арада РД-дин образованидин ва илимдин министерство, «Яндекс.Учебник» платформа ва Дагъустандин образование вилик тухунин институт ава.
Амина Муслимова
