2025-йисан 1-мартдилай Дагъус­тандин жемятдиз тIуьн гузвай чкайри кассадин чек гьакъи гудалди вилик туькIуьрун ва муьш­теридив вугун лазим я. Гила официантривай сифтедай­ мугь­мандиз виликамаз  гудай чек (пречек) къалуриз, ахпа, гьа­къи къачурдалай кьулухъ,  хали­сан чек туькIуьриз хъжедач.

Федеральный налогрин къуллугъдин Дагъустанда авай Управлениди (УФНС) къейд авурвал, цIийи къайдади, гьакъи гьатта тер­миналдай ва я автоматдай гуз хьайитIани, чек виликамаз гьазурун ва кассадай ракъурун истемишзава. И дегишвилер  мугьманривай гьакъи  къачуз, гьа са вахтунда и пул кассадин системада къейд тийизвай заведенийрихъ галаз женг чIугун патал тунва.

Идалайни гъейри, ФНС-дин «Зи чекар онлайн» къуллугъдин куьмекдалди  электронный чекар къачуз жедай цIийи къайда кардик кутазва. Эгер муьштериди тIуьр шейинин гьакъи гудайла телефондин нумра ва я электронный поч­та къалурнаватIа, чек адан «хсуси кабинетда» пайда жеда. Ида бизнесди чарчин чекриз ийизвай харжияр тIимиларда ва гьахъ-гьисабрал гуьзчивал кьезиларда.

Дагъустан Республикада Россиядин УФНС-дин гуьзчивалдай 2-отделдин государстводин налог­рин чIехи  инспектор  Аида Юсуповади гъавурда турвал, гьахъ-гьи­сабрин цIийи къайдади жемятдин тIуьнар гунин хиле гьахъ-гьисабар «алцифбур» ийида, муьштерийри­­вай лагьайтIа, чпи гузвай гьа­къи дуьздаказ гьисабдиз къачунал инан­мишвал ийиз жеда.

Ада гьакIни гуьзчивалдай ва кассадин техника ишлемишунин­ къайда чIурунай жавабдарвилиз­ чIугвазвайди рикIел хкана: он­лайн-кассаяр ишлемиш тийизвай бизнес кьилдин ксар 10 агъзур манатдин ва карханаяр 30 агъзур манатдин жерме авуналди жавабдарвилиз чIугун мумкин я. Къайда чIурай дуьшуьш тикрар хъхьайтIа, къуллугъчияр кIвалахдивай къерех авун ва ИП-дин ва я карханадин кIвалах михьиз акъвазарун мумкин я.

Ж. Саидова