Къе, 28-апрелдиз, Дагъустандин Кьилин везифаяр вахтуналди тамамарзавай Сергей Меликова сифте яз прямой эфир кьиле тухвана. Адан куьмекдалди республикадин жуьреба-жуьре пипIера авай дагъустанвийриз Дагъларин уьлкведин Кьилиз чпихъ авай суалар гудай мумкинвал хьана.

Зи фикирдалди, Сергей Меликова нубатдин сеферда вич жергедин агьалияр патал ахъа кас тирди субутна. И делилди, са шакни алачиз, адаз халкьдин патай авай ихтибар артухарзава.

Прямой эфирдин эвел кьиляй Сергей Меликова Кьиблепатан Дагъустандин шегьерризни районриз финикай, ана авай гьаларикай куьрелди суьгьбетна. Республикадин Кьилин гафаралди, аниз фини вичиз регионда авай месэлайрихъ галаз мукьувай таниш жедай мумкинвал гана. Майдин вацра ам Дагъустандин кеферпата авай районризни фидайвал я…

Прямой эфирдин сергьятра аваз дагъустанвийри гзаф суалар гана. Мектебра авай гьалар, аялрин бахчаяр бес-кьадар тахьун, гзаф аялар авай хизанрин дердияр, етимриз куьмек гун, алакьунар авай жегьилрик руьгь кутун, зирзибил, хуьрер экуьналди, газдалди таъминарун ва маса месэлаяр. Бязи месэлайрин патахъай Сергей Меликова гъиле гъилди талукь идарайриз, ксариз тапшуругъар гана, гьялна акьалтIарна кIанзавай вахтни тайинарна.

Сергей Меликован прямой эфирдиз талукь еке макъала «Лезги газетдин» цIийи нумрадай кIелиз жеда.

Мегьамед Ибрагьимов, «Лезги газетдин» кьилин редактор