Дикъет!
2025-йисан 10-15-июндин йикъара Дербентдин, Къарабудахкентдин, Самурдин, Ногъайдин, Къизлярдин ва Хасавюртдин тамухъанвилин майишатрин мулкарал инсанриз сиягьат авун ва анриз улакьда аваз фин къадагъа авунва. Идакай Дагъустан Республикадин тамарин майишатрин рекьяй Комитетди хабар гузва. Идаради къейдзавайвал, ихьтин къарар кьабулун и мулкара цIаяр кьунин хаталувал винизди хьунихъ (IV и V лагьай дережаяр) ва гьалар хъсан патахъ дегиш жедай себебар гьелелиг тахьунихъ галаз алакъалу я.
Тамара гьалар датIана вилив хуьдайвал, Дагъустандин тамарин майишатрин рекьяй Комитетдин регьбер Вагьаб Абдулгьамидова анриз гьахьдай чкайрал ахтармишдай махсус пунктар (КПП) арадал гъун, тамун къаравулри, мешебегийри гуьзчивал артухарун, патарив гвай чкайрин жемятризни и кардикай виликамаз хабар гун тапшурмишнава.
Идалайни гъейри, хабар гузвайвал, Дагъустандин тамари кьур цIаяр хкадарунин центр виниз тир гьазурлухвилин гьалдиз гъанва — абуру суткадин кьиляй-кьилиз тамарал гуьзчивалзава.
Къейд ийин хьи, гьавадин шартIарихъ галаз алакъалу яз, тамара цIаяр кьунин хаталувилин 5 дережа (класс) ава. Вад лагьай дережади акьалтIай виниз тир хаталувал авайдакай хабар гузва. И вахтунда цIухъ галаз алакъалу жедайла, иллаки еке игьтиятвал авун лазим я.
Гьеле 31-майдиз Россиядин 10-далай гзаф регионра, гьа жергедай яз Дагъустандани, тамари цIай кьунин 5 лагьай дережадин хаталувал авайдакай хабар ганай.
Къейд ийин, Россиядин МЧС-дин Дагъустанда авай управленидин къуллугъчийри тек са суткадин (8-июнь) вахтунда цIаяр кьур 29 дуьшуьш гьисабдиз къачунва. Абурун чIехи пай (19) кьурай векьер-кьалариз цIай ягъунихъ галаз алакъалу я. Идалайни гъейри, цIаяр зирзибил кун патални язава. Гьайиф хьи, са кьадар дуьшуьшра абур, инсандин гуьзчивиликай хкатна, яшайишдин дараматрал, тамарал физва ва мусибатдин дуьшуьшриз элкъвезва. Нетижада майишатриз зарар гузва, инсанар, гьайванар рекьизва.
ИкI, мисал яз, Россиядин МЧС-дин Дагъустанда авай управлениди хабар гузвайвал, 2024-йисуз республикадин мулкунал кьур цIаярин нетижада агьалийриз ва тешкилатриз, карханайриз, санлай къачурла, 250 миллион манатдин зарар гана. Санлай къачурла, шаз республикадин мулкунал цIаяр кьур 3,3 агъзур дуьшуьш хьана. Абур себеб яз, 42 кас, гьа жергедай яз 12 аял, кьена.
Гьаниз килигна, РД-дин тамарин майишатрин рекьяй Комитетди, республикадин тамари кьур цIаяр хкадарунин центради, МЧС-ди датIана тагькимарзава: цIухъ галаз «зарафатар» ийимир!
Амина Муслимова
