Игитдиз – гуьмбет
«Лезги газетдин» алатай нумрада чна СВО-да телеф хьайи чи кьегьал ватанэгьли – Россиядин Игит Муслим Муслимоваз Ахцегьрин хуьруьн 3-нумрадин юкьван мектебда эцигнавай гуьмбет ачухуниз талукьарнавай мярекат кьиле фейидакай хабар ганай. Ахцегь районда алатай гьафтеда мад са къагьримандиз – Россиядин Игит, Украинада кьиле физвай махсус серенжемда телеф хьайи Султан Сулеймановаз эцигнавай гуьмбетни ачухна.
И вакъиадиз талукьарнавай мярекат Цуругърин хуьруьн мектебда кьиле фена. Къейд ийин хьи, и мектеб Султан Сулейманован тIварцIихъ янава. Чирвилерин макандин гьаятда эцигнавай скульптурадин имаратдин автор Россиядин лайихлу художник, машгьур скульптор Шариф Шагьмарданов я.
Гуьмбет ачухуниз талукьарнавай мярекатда муниципалитетдин кьил Абдул-Керим Палчаева, Игитдин диде-бубади, хуьруьн администрациядин регьбер Шемседин Мерданова, образованидин управленидин векилри, депутатри ва масабуру иштиракна.
А.-К. Палчаева вичин рахунра къейд авурвал, Ватан патал СВО-да чанар къурбанд авур кьегьалрин экуь къаматар эбеди авуниз, СВО-дин иштиракчийриз ва абурун хизанриз яшайишдин рекьяй куьмекар гуниз Ахцегь районда кьетIен фикир гузва. Адан гафаралди, Игитдиз гуьмбет эцигун неинки са адан къамат эбеди авунин лишан я, и карди акьалтзавай несилриз чахъ чешне къачуниз лайихлу чIехи ватанпересар авайдини къалурзава.
Игитдин багърийри Султан Сулейманован экуь къамат эбеди авунай Ахцегь райондин кьилевайбуруз сагърай лагьана.
РикIел хкин, Султан Сулейманован бинеяр Кьасумхуьрелай я. 2025-йисан июндин вацра РФ-дин Президентдин Указдалди, адаз кьейидалай кьулухъ Россиядин Игитдин тIвар гана.
Агьмед Магьмудов