Алатай гьафтедин ял ядай йикъара Кьурагь райондин КIирийрин хуьруьн спортдин школада-интернатда (СОШИ) райондин физический культурадинни спортдин ва жегьилрин крарин рекьяй отделди, Россиядин Игит Зейнудин Батманован экуь къаматдиз бахшна, ветеранрин арада волейболдай 7-турнир кьиле тухвана. Турнирдиз спонсорвилин куьмек гайибур Дагъустандин Халкьдин Собранидин депутат Девлетхан Алиев ва адан куьмекчи Агьмед Мегьамедов я.
Райадминистрациядин пресс-къуллугъдин малуматда хабар гузвайвал, и турнирда Кьурагь, Мегьарамдхуьруьн ва Ахцегь районрин, гьакIни Дербент шегьердин командайри иштиракна. Къизгъиндаказ кьиле фейи къугъунрин нетижада Кьурагь райондин ветеранрин команда 1-чкадиз лайихлу хьана. Дербентдин командади – 2 ва Мегьарамдхуьруьн райондин командади 3-чкаяр кьуна.
Вири командайриз медалар, грамотаяр, пулдин ва спортдин пишкешар гана. Турнирда виридалайни хъсандиз къугъвайбур яз гьисабна: Радик Къазиханов (Ахцегь), Омар Омаров (Дербент), Закир Идрисов (Мегьарамдхуьр), Айнуллагь Насруллаев (Кьурагь). Жуьреба-жуьре пишкешриз къугъунрин тамашачияр ва судьяйрин коллегияни лайихлу хьана.
Шабагьар райондин физический культурадинни спортдин ва жегьилрин крарин рекьяй отделдин начальник Рамиз Рамазанова ва Кьурагь райондин кьил Замир Азизова вахкана. Абуру турнирдин гъалибчияр тебрикна, спонсорриз, ам тешкилай ва кьиле тухвай ксаризни сагърай лагьана.
Рагнеда Рамалданова
