1-сентябрь – Чирвилерин сувар – Ах­цегь­­рин 3-нумрадин школада лишанлу­ди хьа­на: анин гьаятда СВО-дин ишти­ракчи, гвардиядин старший лейтенант­, РФ-дин Игит Муслимов Муслим Жави­дови­чаз гуьмбет ачухна, мектебни адан тIва­рунихъ яна. Сифте зенгини Игитдин ­тIва­рунихъ галай школада сифте яз ван авуна.

Шадвилин мярекатда «Ахцегь район» МР-дин кьил Абдул-Керим Палчаева, СВО-дин иштиракчи, гвардиядин майор, РФ-дин Игит Энвер Набиева, Донбассдин чилел­ укронацистрихъни фашистрихъ галаз женгина Ватан патал чан къурбанд авур Игитдин хизанди (буба Жавида, диде Валидади, свас Анастасия Викторовнади), Ахцегь, Рутул ва Докъузпара районрин военный комиссар Аким Ибрагьимова, РФ-дин лайихлу художник, скульптор Шариф Шагьмарданова, школадин директор Гуьлагьмед Рамазанова, райондин образованидин управленидин начальник Заира МутIалибовади ва масабуру иштиракна. Абуру муаллимризни аялриз, абурун диде-бубайриз кIелунин цIийи йис ва школа Игит М.Ж.Муслимован тIварцIихъ ягъун, гьакI памятник ачухун мубаракна. Игитдин уьмуьрдинни женгинин рекьикай ихтилатна, и мектебда кIвалахун, тербия ва чирвилер къачун еке дамах ва жавабдарвал тирди къейдна.

Мярекатдин сергьятра аваз, район­дин дишегьлийрин советдин председатель, РД-дин культурадин лайихлу къул­лугъчи, манидар Таира Муспагьовади Р. Гьам­за­тован «Дурнаяр» мани таъсирдай тегьерда лагьана, муаллим Жамиля Саидовади М. Муслимован экуь къаматдиз бахшнавай вичин шиир кIелна.

Игитдиз памятник ачухунин лишанлу лент атIана, анал цуьквер эцигна ва шикилар яна. Мярекат майдандиз искусстводин школадин кьуьлердайбур, 1-классдиз кам вегьезвай аялар экъечIуналди ва сифте зенг ягъуналди давам хьана.

Дашдемир  Шерифалиев