16-июндиз Махачкъалада Абдулмуслим Абдулмуслимован регьбервилик кваз РД-дин Гьукуматдин заседание кьиле фена. Адан сергьятра аваз, премьер-министрди майишатар электронный гьисабдиз къачунин (электронный похозяйственный учет) жигьетдай СтIал Сулейманан райондин администрацияди кьиле тухванвай кIвалахдиз хъсан къимет гана.
Алай вахтунда ихтилат физвай муниципалитетда ЛПХ-рин (личное подсобное хозяйство) 96 селемдиз талукь делилар электронный къурулушдиз янава.
Заседанидин сергьятра аваз, СтIал Сулейманан райондин кьил Саид Темирханова хабар гайивал, гьар са ЛПХ-диз ктабда учетный записни лицевой счет арадал гъанва ва майишатриз талукь асул делилар кIватIнава.
«И жигьетдай кIвалах кьиле тухудайла, хуьрерин мулкарик акатзавай ва хуьруьн майишатдин метлеб авай чилин вири участокар патал лицевой счетар арадал гъана. Гуьгъуьнлай регистрация авунвай ЛПХ-рин кьилериз талукь махсус карточкаяр кардик кутуна, анра, паспортдин делилрилай гатIунна, гзаф кьадар маса малуматар гьатнава.
Хуьрерин администрацийра компьютеррин программайрай хъсандиз кьил акъатзавай пешекаррин кьитвал ава. И месэла гьялун патал чна муниципалитетдин администрациядин хуьруьн майишатдин управленидин бинедаллаз хуьрерин администрацийриз куьмекар гудай кураторар тайинарна. Абуру, куьмекар гунилай гъейри, ихтилат физвай месэладин жигьетдай хуьрерин администрацийри кьиле тухузвай кIвалах чпин кьетIен гуьзчивилик кутунва», — лагьана С. Темирханова.
А.Абдулмуслимова ЛПХ-яр электронный гьисабдиз къачунин жигьетдай СтIал Сулейманан райондин тежрибадикай менфят къачун теклифна ва РД-дин хуьруьн майишатдин ва недай суьрсетдин министерстводиз СтIал Сулейманан райондин хуьрерин администрацийрин пешекарар патал махсус семинарар тухун буйругъна.
Чи мухбир
