СтIал Сулейманан районда федеральный ва республикадин дережадин къурулушар, идараяр кардик ква. Абурун кIвалахдилай гзаф крар, агьалийрин яшайиш аслу я. Муниципалитетда хъсандиз кIвалахзавай, агьалийрин игьтияжар таъминарзавай идарайрикай сад МФЦ я.
Кьасумхуьрел ам ачухна и йикъара 10 йис тамам хьана. Чун анин директор Афисат Мирзехановна Шагьмирзоевадихъ галаз гуьруьшмиш хьана.
– Афисат Мирзехановна, сифте нубатда юбилей мубаракрай. Заз куьне коллективдикай куьрелди суьгьбетнайтIа кIанзавай.
— Чи гъвечIи хьтин юбилей тебрик авунай сагърай. Коллективдикай завай анжах разивилин келимаяр лугьуз жеда. Чи МФЦ-да 14 касди кIвалахзава. Вири пешедал рикI алай, чирвилер авай, атай инсанрихъ галаз хуш рафтарвал ийизвай къуллугъчияр я. Атай гьар садан дерди-бала туькIуьрун, абуруз герек чар-справка гун — им чи буржи хьиз, намусдин карни я.
– МФЦ гзаф везифайрин центр я. Куьне гьикьван ва гьихьтин везифаяр тамамарзава, агьалийриз гьи рекьерай къуллугъзава?
— МФЦ-дин пешекарри 400-далай виниз жуьрейрай инсанриз къуллугъзава. Абурун тIварар кьунин лазимвал, зи фикирдалди, авач. Вучиз лагьайтIа, къенин девирда интернет вилик фенва, инсанриз чна тамамарзавай къуллугърикай хабар я. Чи пешекарри гьар юкъуз, гьич тахьайтIа, 140-150 касдиз къуллугъзава.
– МФЦ Кьасумхуьрел кардик ква. Куьне тек са СтIал Сулейманан райондин агьалийриз къуллугъзавани?
— Республикадин МФЦ-дин филиалар региондин вири муниципалитетра, шегьерра са шумуд кардик ква. Чна неинки чи райондин, гьакIни Хив, Кьурагь, Агъул ва маса районрин агьалиярни кьабулзава, абурун дердияр туькIуьриз алахъзава. Интернетди гьахьтин мумкинвал гузва чаз.
– Афисат Мирзехановна, чаз куь кабинетда гзаф кьадар грамотаяр, дипломар, кубокар аваз аквазва. Им, гьелбетда, куь филиалдин кIвалахдин нетижа я. ЯтIани чаз куьне филиал республикадин муниципалитетрин арада гьи дережада аватIа лагьанайтIа кIанзавай.
— Чи филиалди 2015-йисуз РД-дин алакъадин ва телекоммуникацийрин министерстводи тухвай «Лучший многофункциональный центр Республики Дагестан» конкурсда «Лучший МФЦ предоставления государственных и муниципальных услуг» номинациядай 3-чка кьуна ва чаз 3-дережадин диплом гана. Гуьгъуьнлай РД-дин экономикадин ва мулкар вилик тухунин министерстводи тухвай конкурсдани чи филиал 3-чкадиз лайихлу хьана. Ихьтин мисалар мадни гъиз жеда. Дипломар, грамотаяр, кубокар чахъ мад ава. Чи кIвалахдиз хъсан къимет гуни коллектив шадарзава. Гележегдани чун и къайдада кIвалах давамариз, агьалийриз ийизвай къуллугърин дережа мадни хъсанариз чалишмиш жеда.
Хазран Кьасумов
