Дагъустанда 2023-йисуз кьиле тухвай капитальный эцигунрин объектриз государстводин кадастрдин къимет гунин кIвалахдин нетижайри квартирайрин ва кьилдин ксарин яшайишдин кIвалерин (ИЖС) кадастрдин къимет хейлин гзаф хьанвайди къалурна. Идакай Росреестрдин республикада авай управлениди хабар гузва.
«ИкI, 2019-йисуз квартирайрин са квадратный метрдин кадастрдин къимет юкьван гьисабдалди 18 агъзурни 587 манатдиз барабар тир. Гьа са вахтунда 2023-йисуз и делилди 41 агъзурни 507 манат тешкилзавай.
ИЖС-дин объектриз талукь гьаларни гьа икI я: яшайишдин кIвалин са квадратный метрдин къимет 5 агъзурни 883 манатдилай 8 агъзурни 186 манатдал кьван хкаж хьана. Алишверишдин объектрикай рахайтIа, абурун са квадратный метрдин кадастрдин къимет 20 агъзурни 203 манатдиз барабар я», — лугьузва малуматда.
Къейдзавайвал, кадастрдин къиметдин цIийи кьадарар 2024-йисан 1-январдилай ишлемишиз башламишнава. Абур гьам кьилдин ксариз, гьамни карханайриз талукь я. Кадастрдин къимет хкажунин асул себеб ам я хьи, идалай вилик къиметар тайинарунин кIвалах 2019-йисуз кьиле тухванай.
«Лезги газет»
