Алатай йисан 28-декабрдиз, М.Насрулаева автор яз, “Лезги газетда” чапнавай ДаркIушрин “Хвай булах” макъала кIе­лайла зун гъиле къелем хьуниз мажбур хьана. Сифте заз, чпин хиве къуллугърин жегьетдай авай везифаяр тIи­мил­­­бур туштIани, школадин директор Сав­­зиханов Савзиханаз, Дагъустандин халкьдин Собранидин депутат Сейфулагь Исакьоваз чпин ери-бинейрихъ рикI куз, чпин харжийрихъ булахдал чIугур еке зегьмет, Майрудиназ Бабаханов Хив райондин Хъукьварин хуьряй абурлу къван гъана Ялцугърал, Е.Эминан су­рухъ­­ гилигун, жемятар йиса садра хъфиз, чеб са вахтара яшамиш хьайи ерий­рал кьил чIугваз, рекьер дуьзар хъийиз, гьанра мав­лидар гун, Ватан ри­кIе­лай алуд тавун­ еке афериндиз ла­йихлу тирди къейд ийиз кIанзава.

Чи Мегьарамдхуьруьн райондик квай гзаф хуьреризни, залзалаяр себеб яз, Ахцегь, Рутул районрай хейлин хуьрерин, зун яшамиш жезвай Бут-Къазмайрал лагьайтIа, Граррин, Ухулрин, Мацарин, Хинерин хуьрерин жемятар куьч хьанва. Абуру яшамиш жедай шар­тIар чпин зегьметдалди арадиз гъана, уьмуьр кьиле тухузва. ЯтIани абурун рикIяй чеб яшамиш хьайи ерияр акъатзавач. Са шумуд ухулви, яшайишдин вири шартIарал­­ таъмин тиртIани, вири чпин майишат ма­са хгана, хизанарни галаз куьгьне чкайриз куьч хъхьана. Грарарин хуьруьн касни амачир ха­ра­пIайра, яшайишдин шар­тIар авачтIани, тек яшлу дишегьли яшамиш жез шумуд йисар я?! Адаз вичин мукьвабуру я Къличхандал, я Бут-Къазмайрал хтай­тIа, яшайишдин вири шар­тIар тешкилун хиве кьунайтIани, къариди завай зун гилалди яшамиш хьайи зи Ватан гадариз жедач лагьана, разивал ганач. Ватан ширин я. Хъсан ашукь, маш­гьур музыкант мацави Шагьлар Абдурагьманов вичин хизанни галаз, малкъара хуьз, текдиз вичин Ватан тир Маца яшамиш жез хейлин йисар хьана. Ада Мацарин гуьзел уьруьшрик вичин кфилдай лезги гуьзел гьавайрин ван куту­най...­

Жуван Ватандихъ рикI кузвай инсанрикай мисалар мад ва мад гъиз жеда. Гьайиф хьи, и гьиссерикай виридаз пай ганвач. Ватандив къадирсузвилелди эгечIзавай  ксарни авачиз туш.

Мегьарамдхуьруьн вини пата Аллагьдин патай яшайишдин вири шартIар кьисметнавай Вини Тагьирхуьр экIя хьанва. А хуьруьн кьилихъ галай булах­дин яд  ин­санрин къенепатан органра къванер арадал гъизвай уьзуьрди гьелекзавай азарлуйриз дава-дарман я. Хуьруьнвийрин лугьунрай, жемятди хъуниз, чайдиз, хуьрекриз гьа яд ишлемишзавайвиляй, хуьре винидихъ тIвар кьунвай азардин са дуьшуьшни малум туш. Яд ишлемишзавайбурун арада ам тухуз патарилай къвез­вайбурни тIимил авач. Мисал яз, къванер арадал атунин азар себеб яз, зун, пуд сеферда операцийрик гьелек хьанай. Цикай менфят хьайибурун меслятралди, за и яд ишлемишиз пуд йис я. Дугъ­ри­дан­ни, азардин къурхулувал амач. Республикадин маса миллетрин векилри­ и булах чпин ихтиярдиз вугун тIала­бай­ла, жемят рази хьанач. Дуьз кIва­лах­на...

Гьайиф хьи, халкьдин сагъламвал хуьзвай булах элкъуьрна кьунвай чкадиз килигайла, инсандин бейни элкъведа. Булахдин патарив гвай чкаяр  чиркинарнава - жемятдин маларини кьацIур­зава, герек амачир къапарни гьанал гадарзава. Вучиз ятIани, и месэладиз хуьруьн Советди са фикирни гузвач. Хуьруьн жемятни, чпи гьар юкъуз и булахдин­ яд ишлемишзатIани, анаг са гьал къайдадиз гъуникай къерех я. Чидач­ вучиз ихьтин къайгъусузвал къалурза­ватIа?!

Музафар Гьасанов, пенсияда авай муаллим, Бут-Къазмаяр