Арбе юкъуз Дагъустандин Кьилин везифаяр вахтуналди тамамарзавай Фёдор Щукина республикада къанун-къайда таъминарунин жигьетдай кардик квай Координационный совещанидин заседание кьиле тухвана. Идакай «Лезги газетдиз» РД-дин Кьилин пресс-къуллугъди хабар гана.

Мярекатдал веревирд авур асул мес­эла Чирвилерин йикъаз талукьарнавай мярекатар ва сентябрдин юкьвара сечкияр кьиле фидай чIавуз хатасузвал таъминарун патал кьабулна кIанзавай серенжемрихъ галаз алакъалу тир.

Малум хьайивал, 1-сентябрдиз рес­публикадин мулкара образованидин 2393 идаради ракIарар ачухда. ГьакIни и юкъуз цIийи ирид мектебни аялрин са бахча ишлемишиз вахкудайвал я.

«КIелунин йисан эвел кьилера образованидин вири идарайра терроризмдин гьерекатрикай ва цIаяр кьунин хаталувиликай хуьн патал эцигзавай махсус алатар кардик кутуна кIанда. Идалай гъейри, вири мектебра, аялрин бахчайра къаравулчияр хьун герек я. Алай вахтунда гьина цIийикIа туькIуьр хъувунин кIвалахар кьиле физватIа, абур вири 1-сентябрдалди акьалтIарун асул шартI я. Чун вири патал ибур кар алай месэлаяр я», – лагьана Фёдор Щукина.

Республикадин регьбердин фикирдалди, сесер гудай сад тир югъ федеральный дережадин важиблу мярекат я. Дагъустанда, кьилди къачуртIа, Госу­дарстводин Думадиз, Халкьдин Собра­­нидиз депутатар хкяда, муниципалитет­рани сечкияр кьиле фида. Сечкияр ла­гьайтIа, пуд юкъуз – 18, 19 ва 20-сентябр­диз – давам жеда.

«Сечкийриз гьазурвал акун ва абур тешкиллувилелди кьиле тухун патал учас­токрин 1726 комиссия кардик кутада. Сесер гудай ихтияр авай агьалийрин сиягьра 1 736 000 кас гьатнава. Чна фикир гана кIанзавай кьилин месэла и йи­­къа­ра сечкияр кьиле физвай гьар са учас­ток хатасузвилелди таъминарун я», – къейдна Фёдор Щукина.

Сечкийриз гьазурвал акунин жигьетдай кьиле тухузвай кIвалахрикай Дагъус­тандин Избиркомдин председатель Мегьамед Дибирова малуматар гана.
Адан гафарай малум хьайивал, сечкияр кьиле тухунал комиссийрин тахминан 13 000 векил машгъул жеда. Сечкияр кьиле физвай йикъара сечкийрин комиссияр авай вири идарайра хатасузвилин месэлаяр кьетIен гуьзчивилик кутада. Гьа са вахтунда герек хьайитIа, алава яз сечкийрин комиссияр патал резервдин 1600 чкани ава.

Мегьамед Дибирова къейд авурвал, хатасузвилиз талукь месэлаяр государстводин гьукумдин, къанун-къайда хуьдай ва чкадин самоуправленидин органрихъ галаз гьялзава. Ада гьакIни хабар гайивал, сечкийрин вилик республикада авай гьалар дурумлубур я, къурху кутадай лишанар, дуьшуьшар авач.

Дагъустандин мектебар кIелунин цIийи йисаз гьазур жезвай гьаларикай вичин ихтилатра РД-дин образованидин ва илимдин министрдин везифаяр вахтуналди тамамарзавай Ягья Бучаева суьгьбетна.

Министрди къейд авурвал, мектебар цIийикIа туькIуьр хъувурдалай кьулухъ кьиле тухванвай кIвалахриз къимет гудай махсус комиссияр арадал гъанва. Абурук шегьерринни районрин админис­трацийрин, МЧС-дин, Росгвардиядин, МВД-дин, Роспотребнадзордин, диде-бу­­байрин тешкилатрин векилар кутунва. Комиссийрин вилик акъвазнавай кьилин месэла гьар са мектеб цIийи кIелунин йисаз гьазур хьанвай гьалдиз дуьзгуьн къимет гун я. И кIвалах 14-августдалди акьалтIарун фикирдиз къачунва.

Идалай гъейри, сечкийрин вахтунда сечкийрин участокар кардик кутадай мектебриз талукь актар РФ-дин просвещенидин министерстводиз 27-июлдалди вахкудайвал я.

Ягья Бучаева заседанидал образованидин идарайра хатасузвал хуьн патал кьабулзавай серенжемрикайни ихтилатна. Адан гафаралди, алай вахтунда вири мектебра, аялрин бахчайра хатасузвилелди таъминарунин жигьетдай кардик кутунвай махсус алатар, тадаракар авай гьал ахтармишзава. Гьа са вахтунда образова­нидин идарайрин регьберри, персоналди­, къаравулчийри чпиз муракаб гьалара герек серенжемар кьабулунин жигьетдай мах­сус чирвилер авайди тестикьарун лазим я.

Заседанидал малум хьайивал, рес­публикадин образованидин саки 2000 идарадин векилри хатасузвилин рекьяй тайин чирвилер къачун патал тешкилай Вирироссиядин ученийра иштиракна. Нетижада абуруз кьетIен гьалара чеб тухунин къайдайрикай, авуна кIани крарикай чирвилер хьанва.

Заседанидин сергьятра аваз, МЧС-дин, къанун-къайда хуьдай органрин къурулушрин векиларни рахана. Гегьеншдиз РД-дин Кьилин сайтдай кIелиз жеда. 

Агьмед Магьмудов