29-30-майдиз къвайи яргъал чIугур марфар Ахцегь район патал тIебиатдин бедбахтвилиз элкъвена. Кьилди къачуртIа, бязи хуьрериз физвай  рекьерин бязи чкайрилай уьцIена, гатфариз дигидай яд ахъаюн патал михьи хъувур хуьлер кьарадив ацIана, «Лекье дере – Ахцегь» цин рекьин кьилин имарат кардикай хкатна.

Идалай гъейри, Самур вацIа цин дережа хкаж хьуникди Ахцегь­рин хуьре КIампIал участокда 100 метрдин мензилда габиондин бан­дарин цал хана. Мад гьакьван­ чка чукIунин хаталувилик ква. Ва­цIун вилик пад вахтунда кьаз та­хьайтIа, жемятдин хсуси майишатар, са­лар-багълар, яшайишдин кIвалер­, магистральный газопровод­, ток­дин симер фенвай шалманар, (ЛЭП) республикадин метлеб авай «Мегьарамдхуьр-Рутул» шегьре рехъ цик акатунин хаталувал ава.

Алай вахтунда Ахцегь райондин кьил Абдул-Керим Палчаеван регьбервилик кваз тIебиатдин бедбахтвилин нетижаяр арадай­ акъу­дунин кIвалахар райондин хсуси­ къуватралди давамарзава. ИкI, мар­фарилай кьулухъ ЖКХ-дин ва райондин маса карханайрин коллективрин, кьилдин ксарин къуват­ралди кьве йикъан къене рекьер-хуьлер туькIуьр хъувуна, цин турба кардик кухтунва, вацIун къерехар мягькемарунин серенжемрив эгечIнава.

Дашдемир  Шерифалиев