Мубаракрай шад сувар!
Хайи газет, хайи миллет агудиз,
Цlийи крар, тlварар дуьздал акъудиз,
Къайгъудар тир хайи халкьдин, несилдин,
Мубаракрай шад сувар ваз асирдин!
Уьмуьрдин пай, вилерин экв гана ваз,
Вафалу тир дуьз веледни хьана ваз.
Хайи халкьдин руьгьдиз къуллугъ авуна,
Кlусни леке, рехне кутун тавуна.
Захъ галаз санал кlвалахай ксарни,
Белки,жеда абурун руьгьдиз хабарни.
И пак тир кар зи хивевай буржи я,
Лайихлу я, кьуртlа абурун тlварарни.
Азизханов милайимдиз рахазва,
Уьмуьрдани писни хъсан аквазва.
Коллективда секин гьалар хьун патал
Редактор я, зам чкадал алазва.
Санал хьана районрани хуьрера,
Журналистдин итижлу тир рекьера.
Ибадуллагь халис уьтквем гьаким тир,
Гьам гафунал, гьам кардални лигим тир.
Агъаризадик тади квай уьмуьрда,
Гуя вичи дуьньядин пад элкъуьрда.
Редакциядин гимидин капитан
Инанмиш тир: вири крар туькlуьрда.
Селимханов аямдар тир, уях тир,
Редактордиз куьмекни тир, даях тир.
Жегьил несилдиз тербия гудай кар
Адан хиве авай буржи, кlвалах тир.
Къурбан стха, Керимовни Манучар,
Гьар сад са отделдин кьиле жавабдар.
Коллективдин кlвалах хъсан хьун патал
Абурлу яз тамамардай гьар са кар.
Мурадалини куьмекдар яз вичин,
Ноябрь вич гагь терс жедай, гагь секин.
Мегьди стха, Сиражудин кlвалахдин,
Яцlа жедай, акъваз тийиз галухъна.
Газетдин чин авун патал дамахдин
Гьар са карни ийиз жедай алукьна.
Ханум вахни Юсуф стха, Къайибхан,
Алибегни… Гьемзетан тIвар гьикI такьан!
Захъ галаз санал кlвалахай ксар я,
Журналистрин жергедавай тlварар я.
Зумриятни чаз виридаз вах хьана,
Художник Абидни чаз бахт хьана.
Гила чеб зи сагълам амай дустарикай
Суьгьбет ийиз заз мумкинвал, вахт хьана.
Аламудин пагьливан хьиз тир пайгар,
Тади жедай, кIвачерик акатна гар.
Азиз Алем шииратдин шагь хьана,
Мадни артух экуь къастни ягь хьана,
Чна санал кIвалах авур йисара
Коллективни ажайиб ислягь хьана.
Шихмурадан намуслувал, инсанвал
Алцум жедай терезар чеб авайд туш.
Чи арада авай дуствал эквеба,
Чна санал хъвайи кагор чинеба,
Икьван чlавал за санални лагьайд туш.
— Гьазур хьанва къведай нумра газетдин,
Артух-кими вуч аватlа гуьзетин.
Макъалаяр бес кьадарда авазва, —
Летучкадал Абдулафис рахазва.
Дагъустандин халкьдин шаир Арбена,
Шииратдиз къилав гана газетда.
Бажарагъни нурлу хьана куькIвена,
Гьуьрмет-хатур артух хьана гьелбетда.
Абдуселим, Дагълар, Тажидин илгьамдар,
Дережайриз къимет гудай вахт хьанач.
Эхь, садаз ганва халкьдин писатель тIвар,
Амайбуруз тIвар къачудай бахт хьанач.
Вилерин нур, руьгьдин эквер, гьа рикl хьиз,
Шииратдиз гайи хва я Мерд Али.
Вири уьмуьр лазим тегьер са цуьк хьиз,
Абур-сабур хвейи хва я Мерд Али.
Даира зун кlвализ рекье хутазва,
Гьакl тарихда гьатун патал вичин тlвар.
Баркаллу хва, къе зи руьгьдиз аквазва
Ви кесерлу таржумайрин са амбар.
Нариман гьакl хийир гудай Эмир я,
Теснифдар я вахтар-чlавар авачир.
(Мадни артух хьурай вичин ктабар!)
Гьарда вичиз кlанивалдай девир я,
Девир я ман кьилел зарпанд алачир.
Къагьриманан авазарни ширин хьуй,
Кхьинарни — метлеблубур къалин хьуй.
Кьве стхади абур гъизва газетдал,
Акъваз тийиз чпин михьи зегьметдал,
Дамах ийиз хайи халкьдин миллетдал.
Шагьисмаилан рикlикай заз хабар я,
Бахцугъарин михьи гьамга булах тир.
Гзаф крар адан гъилин гьунар я,
Гьам веледрин, гьам дустарин дамах тир.
Вуна жувал цlийи тlварар эцигиз,
Макъалаяр — маналубур теснифиз.
Коллективдай вучиз катна, Гьажи, вун?!
Зун амукьна гьамиша ви тереф хуьз.
Гьамидова паркутар зал гьалчай кьван
За элкъвена вири адав вахкузва.
И йисара зи рикl хьана къайи къван,
Къе зи рикlи багъиш ая лугьузва.
Эмираслан кар алакьдай хтул тир,
Арсенни ам сад са кардал машгъул тир.
Журналистдин кlвалах туна, катна ам,
Вичиз хуш тир маса рекье гьатна ам.
Дашдемира, Шарвилидин неве тир,
Шарвилидкай еке ктаб кхьенва.
Шабатован экуь руьгьдин пеше тир
Бейтерикай нурар хьана куькlвенва.
Сифте Далгат, гележегда
Тажидинни Гьуьруьят
Шикилчи журналистар тир газетдин.
Газетдин чин гуьрчегардай зегьметда,
Абурун пайни еке тир, гьелбетда.
Жагъурзавай гафар рикlин дериндай,
Эхь, мектебдин ученикдин кхьинрай,
Гуя адан гележег заз аквазва,
Мегьамед, зун гила вакай рахазва,
Гьакl Мусани къе зи рикlел алазва.
Буба лугьуз, зи хъуьчlуькай кьаз хьана,
Зи патайни еке гьуьрмет ваз хьана.
Ви хиве къе жавабдарвал ава, хва,
Агъунва ви бажарагъдихъ буба, хва!
Илгьамдардин багьа хтул Жасмина,
Амайбурулай ви бажарагъ вине я.
Къведай кас жеч гьич санал ви бягьсина,
Велед хвейи вун баркаллу диде я.
Жамиля, вахъ хатlни авай, гьам чирвал,
Сад Аллагьди секин къилих ганач ваз.
Гьуьрметарни ийизвай ваз лап тирвал,
Гьич саданни къадир, гьайиф хьанач ваз.
Надият, вун хайи вахан ери я,
Вун шад хьайла, зи рикlизни хвеши я.
Рагнеда, вун руьгьдин назик цуьк ятlа?!
Журналист ви ачух, михьи рикl ятlа?!
Зара, Майрам, Эльмира багърияр хьиз мукьва тир,
Кьурагь дагъларин къужахда хайибур.
Земфирани Зарема заз багьа тир,
Коллективда гьуьрмет-хатур хьайибур!
Телефондай мад захъ хуш сес галукьна,
На лугьуди, заз экуь югъ алукьна.
Хабар кьазва Розадини-веледди,
Абуру зи руьгьдал либас алукlна.
Вири рушар за чпин тlвар кьун тавур,
Гьич садрани чпи хатур хун тавур.
Вири санлай гьа велед хьиз хуш я заз,
Квекай гьар сад тlвар багьа тир руш я заз.
Дианани Шерихан, Насиятни Насима,
Беневшани Шагьнабат
Куь тIварар за гьикI такьан,
Мецел алаз даима…
Хайи газет, хайи миллет агудиз,
Цlийи тlварар, крар дуьздал акъудиз.
Къайгъудар тир хайи халкьдин, несилдин,
Мубаракрай ваз шад сувар асирдин!
Казим Казимов, 1984-2014-йисара
“Лезги газетдин” культурадин отделдин редактор,
Дагъустандин “Къизилдин къелемдин” сагьиб
