Лезги печатдин тарих туьрк чIалал “Шура Дагъыстан” (“Советский Дагестан”) акъатай 1920-йисалай гатIунзава. Адалай инихъ газетдин тIвар са шумуд сеферда дегиш хьана: “Дагъыстан фукъарасы” (“Дагестанская беднота”), “ЦIийи дуьнья” (“Новый мир”), “Социализмдин пайдах” (“Знамя социализма”), “Коммунист”. 1991-йисалай инихъ “Лезги газет” тIвар алаз акъатзава.
Алай йисуз халкьдин рикI алай газетдин 100 йисан юбилей я. Тамам са асир!
“Лезги газет” Дагъустандин жемиятдинни сиясатдин газет я. Республикадин жемиятдин ва сиясатдин уьмуьрда кьиле физвай вакъиайрилай гъейри, ана тарихдиз, медениятдиз, эдебиятдиз, яшайишдиз… талукь месэлайрайни хейлин макъалаяр чапзава.
Лагьана кIанда, газет лезги халкьдиз дуьньяда, уьлкведа, республикада, Лезгистанда кьиле физвай вакъиайрикай, мярекатрикай, гьерекатрикай хабар гузвай кьилин къуватдиз элкъвенва.
Газетдиз мукьвал-мукьвал чи халкьдин баркаллу рухвайрикайни рушарикай итижлу макъалаяр, очеркар акъатзава. Мисал яз, дагъвийрин руьгьдин буба, шейх Ярагъ Мегьамедакай, арифдарар тир Ахцегь Мирзе Алидикай, Алкьвадар Гьасан эфендидикай, Гьажи Давудакай, Етим Эминакай, СтIал Сулейманакай ва гзаф кьадар масабурукай. Са макъалада чи милли дестекрин виридан тIварар кьун мумкин кар туш.
Газетдин кIвалахдин кар алай хилерикай сад хайи чIал хуьн ва ам вилик тухун я. И месэладайни газетдиз мукьвал-мукьвал макъалаяр акъатзава, муаллимрихъ, алимрихъ, писателрихъ галаз интервьюяр тухузва. Мадни башкъа, хайи чIал хуьнин макьсаддалди газетдин редакцияди гьар йисуз жуьреба-жуьре конкурсар тешкилзава.
Винидихъ къейд авурвал, цIи “Лезги газетдин” 100 йис тамам хьанва. Алай вахтунда редакциядин коллектив баркаллу юбилейдиз гьазур жезва. Вилик кьилиз акъудна кIанзавай са жерге месэлаяр ква. Милли газетдин юбилей хъсан дережада аваз кьиле фидайдал са шакни алач.
Къейдна кIанда, редакцияда кIвалахзавай журналистар ина фадлай арадал атанвай адетриз вафалу я. Къенин юкъуз газетдин кьилин редакторвиле кIвалахзавай Урусатдин писателрин ва журналистрин Союзрин член Мегьамед Ибрагьимован кIвалахдал зун гзаф шад я.
За “Лезги газет” редакциядин коллективдиз, кьилди къачуртIа, ина намуслувилелди зегьмет чIугвазвай К.Н.Ферзалиеваз, М.А. Жалиловаз, Ш.Ш.Шихмурадоваз, Д.Б.Бейбалаеваз, Н.М.Ибрагьимоваз, М.А.Агьмедоваз, Ж.М.Саидовадиз, Р.С.Рамалдановадиз ва муькуь стхайризни вахариз 100 йисан юбилей рикIин сидкьидай мубаракзава. Къуй квехъ чандин мягькем сагъвал, кIвалахда еке агалкьунар хьурай.
А.Агьмедагъаев,
РД-дин хуьруьн майишатдин лайихлу къуллугъчи
