Мукьвара «Лезги газетдин» редакцияда хейлин йисара Махачкъаладин са мектебда лезги чIалан муаллим яз кIвалахай гьевескар шаир, бине Кьурагьрин хуьряй тиh Мариян Бугаевадин «Дагъларин авазар» ва «Лацу лифрен лувараллаз» ктабрин презентация кьиле фена.
Мярекатда «Лезги газетдин» кьилин редактор Мегьамед Ибрагьимова, Р. Гьамзатован тIварцIихъ галай ктабханадин кьилин къуллугъчи Секинат Мусаевади, А. Гьасанан тIварцIихъ галай центрада кардик квай лезги дишегьлийрин Советдин векил Гуьлизар Оружевади, кIвалахдин рекьяй Мариян Бугаевадин юлдашри, мукьва-кьилийри, Москвадай хтанвай мугьманри иштиракна.
Вичин рахунра М. Ибрагьимова Мариян Бугаевади фадлай «Лезги газетдин» редакциядихъ галаз алакъаяр хуьзвайди, адан шиирар, макъалаяр ара-ара газетдин чинриз акъатзавайди, ада шегьердин чкада лезги чIал хуьнин ва вилик тухунин карда чIугвазвай зегьмет къейдна, адан эсеррикай вичин фикирар лагьана.
Презентациядал М. Бугаевадин уьмуьрдин ва кIвалахдин рекьикай ам фадлай чизвай ксари ихтилатарна, адан шиирар кIелна, лезги халкьдин манияр тамамарна.
Эхирдай хайи чIалал кьару Мариян Бугаевади мярекат тешкилиз ва кьиле тухуз вичиз куьмекар гайибуруз сагърай лагьана ва цIийиз чапдай акъатнавай ктабар арадал атуникай, абурун кьетIенвилерикай лагьана.
Агьмед Магьмудов
