«Ракьун манатрин гьафте!»

Дагъустанда алай вахтунда «Ракьун манатрин гьафте» лишандик кваз Вирироссиядин серенжем кьиле физва. Ам 19-апрелдалди давам жеда. Идакай чаз Милли банкунин РД-да авай отделенидин пресс-къуллугъди ха­бар гана.

«Дагъустанвийривай чпи кIватI­на­вай ракьун манатар чарчин­ пулариз элкъуьриз ва я банкунин счётдиз ягъиз (эцигиз) жеда. И серенжем пулсузди я. Алатай йисуз­ ихьтин серенжем кьве сеферда­ кьиле тухванай. Республикадин агьалийри 680 агъзур манатдин кьадарда аваз ракьун манатар чарчин пуларихъ дегишарна», — раижзава малуматда.

Дагъустандин отделенидин банкунин управляющийдин замес­ти­тель Светлана Бацынади ракьун пулар, номиналриз килигна, кьилди-кьилди эцигун меслят къалурзава. ГьикI хьи, икI пулар гьисабзавай вахт хейлин кьенят жезва.

Къейд. Ракьун манатар респуб­ликадин коммерциядинбур тир банкарин вири отделенийра дегишариз жезва.

Луту кьуна

Дагъустандин МВД-дин пресс-къуллугъди хабар гузвайвал, Каспийскдай тир 30 йисан яшда авай дишегьлидал лутувиляй са шумуд тахсиркарвал авунай шак физва.

ИкI, сотовый телефонрин салондин иесиди, законсуздаказ жуьреба-жуьре банкарин мобильный приложенийрикай менфят къа­­­чуналди, Махачкъаладин агьали тир 51 йиса авай дишегьлидин тIварцIихъ 670 агъзур манатдин кьа­дарда аваз кредитар къачуна. Ахпа а пулар вичин карточкадиз вегьена.

Шак физвайда меркезви дишегьли вичин куьгьне телефон цIийидахъ дегишардай мумкинвал­ авайдахъ чIалахъарна, яни ви­лик­дай телефон маса къачудайла,­ страховка туькIуьрнава лагьана та­парарна, телефон вичив вугун тIа­лабна. Идалди вичин чIуру ниятар кьилиз акъудна, хабарни авачиз чара касдал са шумуд кредит илитIна. Абурукай меркезви дишегьлидиз ахпа чир хьана. И тегьерда салондин иесиди 70 кас алцурарна, санлай къачурла, 10 миллион манатдилай виниз зиян гана.

РФ-дин УК-дин 159-статьядин 4-паюнай (лутувиляй) уголовный дело къарагъарнава.

Пул чуьнуьхна

Махачкъаладин Кировский отделдин полициядин участковыйди 400 агъзур манат пул чуьнуьхнавай 20 йиса авай жегьил кьуна.

Силисдин нетижада малум хьайивал, стеклопластика акъуд­завай цехдин иесиди — 43 йиса авай итимди — ана кIвалахзавай ксариз (пул чуьнуьхнавай гададини ина кIвалахзава)  мажиб гайидалай кьулухъ амукьай пул эцигнавай чка акуна. Йифиз лап геж хьиз, плас­тикадин ракIар хана, ам цехдиз гьахьна, тумбочкада эцигнавай 400 агъзур манат чуьнуьхна. И пулунин чIехи пай жегьил харж ийиз агакьнавай, амайди иесидив вахканва.

РФ-дин УК-дин 158-статьядин 3-паюнай (чуьнуьхунай) уголовный дело къарагъарнава.

Р. Рамалданова