ТуькIуьр хъувунин кIвалахар
2025-йисуз Дагъустанда, РД-дин Гьукуматдин къарардал асаслу яз, кьакьан гьавайрин 104 кIвал капремонт авун фикирда кьунва. Идакай «Дагъустандин экономика» телеграм-каналди хабар гузва.
И серенжемдиз 815 миллион манатдив агакьна пулдин такьатар чара ийида. Ремонтдин кIвалахар кьиле тухудай кIвалер республикадин цIуд шегьердани Казбек райондин Дубки посёлокда ава.
Къейдзавайвал, кIвалерин кьадардик муниципалитетрин къарардалди дегишвилер кухтун мумкин я. ЦIи ремонтдай виридалайни «яшлу» кIвал Къизлярда авай, 1951-йисуз эцигнавай кьакьан гьавайрин дарамат я.
13 миллион кIезри
Дагъустандин гьавизра кIезрийрин шарагрин кьадар 13 миллиондин артух хъхьана. Идакай «Дагъустандин экономика» телеграм-каналди кхьизва.
Чешмеди раижзавайвал, кьилди къачуртIа, «Главрыбводдин» Терско-Каспийский филиалди алай йисуз Дагъустандин гьавизриз 350 агъзур уьлчмедилай гзаф буькре (осетр) женсинин хизандик акатзавай кIезрияр ахъайнава.
Гьа са вахтунда телеграм-каналди, РД-дин балугърин майишатдин комитетдин председателдин гафарал асаслу яз, хабар гузвайвал, республикадин цин гьамбарханайриз 2024-йисуз, санлай къачурла, винидихъ къейднавайвал, 13 миллион уьлчмедилай гзаф балугъар ахъайнава.
2024-йисан нетижайралди…
2024-йисан нетижайралди, Дагъустанда агьалийриз яшайишдин рекьяй 11 миллиондив агакьна электронный къуллугъар кьилиз акъуднава. Идакай, республикадин вице-премьер А. Магьмудован гафарал асаслу яз, РД-дин Гьукуматдин телеграм-каналди хабар гузва.
Адан гафарай малум жезвайвал, агьалийриз къулайвилер арадал гъун патал вири уьлкведа яшайишдин жигьетдай куьмек гуниз талукь серенжемар рекъемрин жуьреда авун виликди физва. Гьа са вахтунда чешмеди раижзавай къейдерай гъавурда акьазвайвал, республикадин са бязи муниципальный тешкилатривай ЕГИССО-дин (Единая государственная информационная система социального обеспечения) хилен кIвалах къайдадик кутаз хьанвач. И делилдихъ галаз алакъалу яз, вице-премьерди муниципальный тешкилатриз талукь серенжемар кьиле тухунин патахъай лагьанва.
Гьазурайди — Муса Агьмедов
