Гьазурвал аквазва

Дагъустанда 2027-йисан бегьер патал 93 агъзур гектардин майданра зулуз техилдин магьсулрин тумар цун пландик кутунва. Идакай Дагъустандин хуьруьн ма­йишатдин ва недай суьрсетдин минис­тер­стводин телеграм-каналди хабар гузва.

Чешмеди къейдзавайвал, алай вахтунда майишатри гьазурвилер аквазва,      3 агъзур гектардилай гзаф майданар тумар цун патал гьазур я.

Виридалайни гзаф Хасавюрт (19,5 агъзур гектар), Къарабудахкент (10 агъзур гектардилай гзаф), Ногъай (9,6 агъзур гектар), Къизляр (7,5 агъзур гектар) районра цадайвал я.

Чешмеди хабар гузвайвал, 20 агъзур тонн кьван тумар герек къвезва. Алай вахтунда майишатра герек тир кьадардин кьудан са паюнилай артух тумар ава. Районрин АПК-дин управленийрин вилик бес тежезвай тумар маса къачунин месэла эцигнава. Гьа са вахтунда абуру къачузвай­ тумарин еридизни кьетIен фикир гана кIан­зава.

Къейдзавайвал, чуьлдин кIвалахриз гьазурвал акунин метлеблу хилерикай­ сад майишатар дизелдин кудайдалди­ таъминарун яз ама. Раижзавайвал, и кар патал региональный кьуд оператор­ тайи­нарнава. Кудайди агакьарунин кIвалах майишатри ганвай арзайрин бинедаллаз кьилиз акъудзава.

Къейдзавайвал, алай вахтунда кьилинди аграрийрин гьазурвилин герек тир дережа, тумар, кудайди ва маса такьатар вахтундамаз агакьарун, цунин кIвалахар хъсан шартIар авай муддатда кьилиз акъу­дун таъминарун я.

Хъсанбуралди…

«Дагэнерго» филиалдин пешекарри 2026-йисан эвел кьилелай инихъ ЛЭП-ра (линии электропередач) 0,4-10 кВ-дин 89 километр куьгьне хьанвай симер СИП (самонесущий изолированный провод) жуьрединбуралди дегишарнава. Идакай «РСК» карханадин телеграм-каналди хабар гузва.

Гьа са вахтунда, чешмеди СИП-дин кьетIенвилерикайни раижзава:

– ам гьавадин четин шартIариз дурум гуз жедайди я;

– гар акъатай вахтунда и жуьредин симер сад-садал гьалтайла ва абурал маса затIар аватайла куьруь замыканияр жедач;

– муркIади са акьван  кьазвач;

– ам инсанар, къушар ва гьайванар патал хатасуз я.

Чешмеди адетдин симер СИП-далди дегишаруни вуч гузватIа, гьадакайни лугьузва:

– агьалийрив электроэнергия агакьарунин ихтибарлувал ва ери артухарзава;

– электричестводин рекьяй хатасузвал хуьнин къайдаяр чIурунин дуьшуьш хьайитIа, мумкин тир хаталувал агъузарзава ва икI мад.

Хабар гузвайвал, алай йисан эхирдалди пешекарри ЛЭП-ра мад тахминан 288 километр кьецIил симер СИП-далди дегишарда.

КIвалахар давамарзава

Дагъустанда пешекарри рекьер хуьнин ва абур хъсанарунин кIвалахар давамарзава. Идакай региондин транспортдин ва рекьерин майишатдин министерстводин телеграм-каналди хабар гузва.

Кьилди къачуртIа, чешмеди къейдзавайвал, региондин вири мулкарал рекьерин къурулуш хуьнин ва хъсанарунин жигьетдай пландик кутунвай ва цIийиз арадал атанвай кIвалахар тамамарзава. Ара атIун авачир ва хатасуз гьерекат таъминарун патал дагълух ва дуьзенлух районра бригадайри зегьмет чIугвазва.

 Тамамарзавай асул кIвалахар ибур я:

– рекьер уцIенвай рагарикай ва шимерикай михьи авун;

– рекьерилай яхдиз элячIдай чкайриз шир ягъун;

– фурар хьанвай чкаяр ремонт хъувун;

– рекьерал аватнавай накьварни  къванер михьи хъувун;

– машинар гьалдай чкайрилай къванер алуд хъувун;

– рекьер зирзибилрикай ва анрал пайда хьанвай маса затIарикай (гъвечIи къванер, къум, накьв…)  михьи хъувун.

Чешмеди гьакIни раижзавайвал, рес­публикадин и хиле кIвалахзавай пешекарри рекьер авай гьалдал гьар юкъуз гуьзчивал тухунин, гьавадин шартIар дегиш хьайила, гьасятда серенжемар кьабулунин кIвалахар давамарзава.

Гьазурайди – Муса  Агьмедов