Вучиз бес жезвач?

Дагъустандин эцигунрин, архитекту­радин ва ЖКХ-дин министерстводин те­леграм-каналди Дербент шегьерда целди таъминарунин жигьетдай вучиз кьитвал аватIа, гьадакай раижзава.

Вучиз яд бес жезвач? И суалдиз чешмеди ихьтин баян гузва.

Дербент датIана целди таъминарун патал суткада 60 агъзур кубометрдилай тIи­мил тушиз цин игьтияж ава. Гьа са вахтунда чешмейрай хкудзавайди 46 агъзур кубометр кьван я. Шегьердив лагьайтIа, юкьван гьисабдалди 16 агъзур кубометр агакьзава.

Месэладин кьилин себеб «Самур –  Дербент» ва «Къайтагъ – Дербент» турбайрин къурулуш куьгьне хьун я. Яд рекье квахьунин кьадар суткада тахминан 30 агъзур кубометрдив агакьзава.

Раижзавайвал, ракъурзавай цин кьадар артухарун патал ва ам рекье квахьунин себебар арадай акъудунихъ элкъуьр­навай са жерге серенжемар Дагъустандин эцигунрин, архитектурадин ва ЖКХ-дин министерстводи сад тир оператордихъ галаз санал веревирдзава.

Гьихьтин месэлаяр гьялун веревирдзава?

Кардик квай «Самур – Дербент» цин турбайрин къурулуш ремонт авун. 2,8 километрдин мензилда участок дибдай ремонт авуни шегьердив агакьдай цин кьадар суткада 3 агъзур кубометрдин гзафардай мумкинвал гуда.

«Къайтагъ – Дербент» цин турбайрин цIийи къурулушдай гузвай яд гзафарун. Цин турбайрин къурулушдин кIва­лах акьалтIарнава. Алай вахтунда Дербентдиз фикирда кьунвай суткада 5-15 агъзур кубометрдилай тIимил тушиз яд ракъурунин мумкинвал веревирдзава.

Яд метлебдив кьурвал серф авун. Хъвадай яд, технический игьтияжриз, гьакI хуьруьн майишатдин чилер дигиниз ишлемиш тавун, хуьруьн чкайриз ракъурунин кIвалах къайдада тун пландик кутунва.

Цин турбайрин алава къурулуш туь­к­­Iуьрун. Дербент патал гужлувал  сут­када 25 агъзур кубометрдилай тIимил тушир цIийи магистраль арадал гъунин месэла веревирдзава.

Шегьердин къурулуш артмишун. ЦIийикIа туькIуьруниз (реконструкция) талукь тир куьчеяр сетрик кутунин месэлаярни гьялзава.

Гьа са вахтунда хабар гузвайвал, идалайни алава, «Южный» ва «Аваин» мик­рорайонрин агьалияр патал цин алава чешмеяр арадал гъун веревирдзава, гьа гьисабдай яз, кьуд къуйдинни.

Дербент целди таъминарун гьар са па­тахъай делилар фикирда кьуна исте­миш­завай месэла я. Неинки агакьзавай цин кьадар артухарун, гьакI ам рекье квахьун тIимиларун, куьгьне сетар цIийи къайдада туьхкIуьрун, ресурс нетижалудаказ гьар патахъ чара авунни таъминарун важиблу я.

Гзафбуру хийир къачузва

«Газпром межрегионгаз Махачкала»­ тешкилатдин саки 200 агъзур абоне­мент­ди­ мобильный телефонрин «Мой газ»  (Android) ва «Газ онлайн» (iOS) приложе­нийрикай хийир къачузва. Идакай­ «Мин­­энерго Дагестана» телеграм-канал­ди хабар гана. 

Къейдзавайвал, алатай йисав гекъигайла, тIвар кьунвай приложенияр ишлемишзавайбурун кьадар цIи 7 процентдин артух хьанва.

«Мой газ» ва «Газ онлайн» приложенийри газдин гьакъи комиссия галачиз гудай, счетчикдин рекъемар агакьардай, вич-вичелай гьакъи гунин ва электронный квитанция къачунин къайда кардик кутадай­ мумкинвал гузва. Ибурулайни гъейри, «Мой газ» приложенидин куьмекдалди са шумуд лицевой счет идара ийиз ва абуруз талукь яз тайинарнавай буржар чириз жезва.

Тешкилатди рикIел хкизвайвал, счетчикрин делилар гьар вацран 25-далди агакьарна кIанзава, гьакъи гьар вацран 15-далди гунин къайда тестикьарнава.

ЦIийи къурулуш

Махачкъала шегьердин Семендер поселокдин агьалияр патал целди таъми­нардай алай девирдин къурулуш туь­кIуьр­да. Идакай Дагъустандин ЦУР-дин телеграм-каналди раижзава.

Къейдзавайвал, проектдин метлеб агьалияр целди таъминарун артухарун­ ва алай девирдин къурулуш арадал гъун я. Адан сергьятра аваз, 74 километр цин цIийи турбаяр, гьарда 1000 кубометр гьакь­дай 2 гьамбархана ва насосрин 2  станция эцигун фикирдиз къачунва.

Гьазурайди – М. Агьмедов