РД-дин туризмдин ва художественный сеняткарвилерин министр Эмин Мерданова къейд авурвал, алай йисуз Дагъустандиз мугьман хьайи туристрин кьадар, 2024-йисан 1-ноябрдин делилралди, 1 миллионни 695 агъзур касдив агакьнава. Адан гафаралди, алатай йисан и девирдин делилрив гекъигайла, им 5 процентдин гзаф кьадар я.
Министр инанмиш тирвал, республикадиз ял ягъун ва сиягьат патал къвезвайбурун кьадар къвердавай гзаф хьуни Дагъустандиз туризмдин жигьетдай гележег авайдан гьакъиндай шагьидвалзава. Министерстводи лагьайтIа, и хел еримлу авун, туристриз къулай шартIар тешкилун патал кIвалах гегьеншарзава. ИкI, гьуьлуьн къерехда авай муниципалитетрин администрацийрихъ галаз эхъведай чкаяр санитариядинни эпидемиологиядин рекьяй къайдадиз гъунин кIвалах тухузва.
Къенин юкъуз республикадин мулкунал мугьманханайриз талукь тир вири истемишунриз жаваб гузвай 170 объект ала.
Эмин Мерданова регионда туриствилин налог кардик кутадай планар авайдакайни лагьана. Туриствилин налог – им мугьманханайра ва маса чкайра яшамиш хьун патал акъваздайла, къачузвай налог я. Адан кьадар региондилай аслу я, амма 1 процентдилай гзаф ва 100 манатдилай тIимил хьун лазим туш. И пул муниципалитетрин бюджетриз фин лазим я.
Жасмина Саидова
