Ягья Бучаева кьетӀен гьаларин нетижаяр арадай акъудунин барадай рабочий дестедин заседание тухвана. Кьилин месэла 28-мартдиз ва 4-5-апрелдиз гьавадин татугай шартӀарин нетижада зиян хьайи образованидин тешкилатар арадал хкун тир.
Эхиримжи делилралди, тӀебиатдин бедбахтвилин нетижада республикадин мулкунал образованидин 93 объектдиз зиянар хьанва. Министерстводин пешекарри виликамаз кьиле тухвай ахтармишунрин нетижада малум хьайивал, 90 дарамат бинедилай ремонт авуналди гуьнгуьна хтунин лазимвал ава. Пуд объект лап татугай гьалдиз атанва, абур ишлемишун патал виже текъведайбур яз гьисабнава.
Зарар хьанвай чкайра аялриз чирвилер гун атIунар авачиз давамарун патал алай аямдин модульный школаяр агакьарунин ва монтаж авунин месэладиз килигзава. Абур образованидин тамам комплексар я, абурук кӀелдай корпусар, спортдин заларни тIуьн гудай блокар акатзава, герек вири тадаракралди таъминарнава.
Видеоконференцалакъадин къайдада кьиле фейи совещанидин вахтунда муниципалитетрин векилри ва министерстводин къаюмвилик квай идарайрин кьилери чкайрал авай гьаларикай докладар авуна. Министрди, федеральный метлеб авай ЧС малумарунихъ галаз алакъалу яз, ганвай зиянар документралди тестикьарунал ийизвай гуьзчивал жезмай кьван гужлу ийизвайди къейдна.
«Зиянар хьанвай гьар са тешкилатда зарар гьисабдиз къачудай пешекаррин дестеди тади гьалда кӀвалахиз башламишун лазим я. Зарар хьанвай гьар са чкадиз талукь делилар ва адан тахминан къимет документралди тестикьарун важиблу я – им такьатар чара авунин ва гуьнгуьна хтунин кIвалахар башламишунин бине я», – къейдна министрди.
Заседанидин нетижада образованидин тешкилатрин кьилерал къенепатан комиссийрин кӀвалах лап куьруь вахтунда акьалтӀарун тапшурмишнава. Тамам сметаяр туькӀуьрунин кардал муниципалитетрин капитальный эцигунрин управленийрин (УКС) ва ЖКХ-дин талукь пешекарар желбда.
Школаяр ва аялрин бахчаяр гуьнгуьна хтунин месэла Дагъустан Республикадин кьиле авайбурун, РФ-дин просвещенидин министерстводин гуьзчивилик ква.
Чи мухбир
