И мукьвара Башкириядин меркез Уфада, Россиядин халкьарин 2-спартакиададин сергьятра аваз, грекринни римлуйрин жуьреда кьуршахар кьунай кьиле фейи акъажунра чи машгьур спортсмен, вичин ери-бине Ахцегьай тир Анвар Аллагьярова 60 кг-дал къведалди заланвал авайбурун арада гимишдин медаль къазанмишна.

РикIел хкин, алай йисан майдин эхирра Суздаль шегьерда Анвар Аллагьярова грекринни римлуйрин жуьреда кьуршахар кьунай Россиядин чемпионвилин тIвар къазанмишнай. ТIарвал себеб яз, акъажунрикай са кьадар вахтунда къерех хьанвай Анвар Аллагьярова 60 килограммдин заланвал авайбурун арада финалда Европадин ва дуьньядин чемпион Садык Лалаевахъ галаз бягьсина, техникадин хъсан алакьунар къалуруналди (гьам партерда ва гьамни стойкада), инанмишвилелди гъалибвал къазанмишнай. А. Аллагьяров Европадин чемпионатдин гимишдин призёр, хейлин турнирринни акъажунрин гъалибчи я.

Чна адаз сагъламвал гуьнгуьна гьат хъувун, мадни зурба дережайриз хкаж жедай къуватар хьун алхишзава.

***

Са тIимил вахт идалай вилик­ Астраханда чи уьл­кведин 23 ­региондай тир 165 спорт­смен­дин иш­ти­рак­­вал аваз кьиле фейи Вирироссия­дин «Вад гьуь­луьн Кубок» акъажунра жаванрин арада самбодай гимишдин медаль къазанмишай чи ватанэгьли Амир Хиди­роваз спортдин рекье гьуьндуьр дережайриз акъатун, чи халкьдин­ тIвар машгьурдай жегьилрин­ арада хьун алхишиз кIанзава.

Люберцы шегьерда яшамиш жезвай, самбодай шегьердин федерацияда  тренер Павел Худякован  гъилик вердишвилер къачузвай А. Хидировахъ жуьреба-жуьре агалкьунар икьван гагьдини хьанва, инанмиш я, вилик мадни кьакьан дережаяр ква.

Рагнеда  Рамалданова