И йикъара Кабардино-Балкариядин меркез Нальчикда япариз зайифдиз ван къвезвайбурун арада тхэквондодай кьиле фейи Россиядин чемпионатда Дагъустандин хкянавай командадик кваз иштиракай чи ватанэгьли, вичин ери-бине Ахцегь райондин Луткунай тир Замир Шихамадов (80 кг-дилай гзаф заланвал авайбурун арада) къизилдин медалдиз лайихлу хьана. Санлай къачурла, 12 медаль къазанмишуналди (къизилдин — 4, гимишдин — 4 ва буьруьнждин — 4) Дагъустандин хкянавай командади 1-чка кьуна.
РикIел хкин: З. Шихамадова жаванрин арада Россиядин кIвенкIвечивал патал акъажунра галаз-галаз 4 йисуз гъалибвилер къазанмишна. Гила адакай галаз-галаз ругуд лагьай сеферда уьлкведин виридалайни кьилин акъажунрин гъалибчи хьанва. Са шумуд йис идалай вилик Карачаево-Черкесиядин меркез Черкесск шегьерда Россиядин тхэквондодин Союздин президентдин Кубок патал кьиле фейи акъажунрани Замира 1-чка кьунай. Жуьреба-жуьре турнирра агалкьунар ада мадни къазанмишнава.
Къейд авун лазим я хьи, Россиядин чемпионвилин тIварцIи — нубатдин гъалибвили — Замир Шихамадоваз Сурдлимпиададин къугъунра иштиракдай мумкинвал гузва (абур алай йисан эхирра Токиода кьиле фида).
Бедендизни руьгьдиз мягькем чи кьегьал ватанэгьлидихъ спортсмендин уьмуьрда виридалайни кьилинбур тир и акъажунрани къуй еке агалкьунар хьурай!
Рагнеда Рамалданова
