Са шумуд югъ идалай вилик Майкопда дзюдодай, «Кавказ» лигадин сергьятра аваз, командайрин арада кьиле фейи акъажунра «СШОР Ставрополь – 1» командадик кваз иштиракай­ чи ватанэгьли, вичин ери-бине Мегьа­рамдхуьряй тир Рамин Баязова, 90 кг-дин заланвал авайбурун арада гъалибвал къазанмишуналди, командадиз пулдин­ еке пишкешдин сагьиб жедай ва 7-ноябрдиз Москвада кьиле фи­дай дивизиондин чIехи финалда чпин устадвал къалурдай мумкинвал гана­. Акъажунра «Майкопдин дзюдодин школа»­ (Адыгея) – 2, «СШОР Ставрополь 2» (Ставрополдин край) – 3 ва «Эдельвейс» (Чечня) 4-чкайриз лайихлу хьана.

Рамин Баязова кьиле тухвай пуд бягьс­ни вахт амаз (досрочно), техникадинни тактикадин рекьерай виниз тир гьазурвал къалуруналди, акьалтIарна. Финалдин бягьс кьетIендаказ къейд авуниз лайихлу я, гьикI хьи, чи ватанэгьлидиз Россиядин Кубокдин чемпион, Европадин Кубокдин кьве сеферда призёр, Майкопдин командадай тир Алия Тадхужевахъ­ галаз вичин къуватар ахтармишун кьисмет хьанвай. И бягьсни ада инанмишвилелди гъалибвал къазанмишуналди акьалтIарна. Аферин!

РикIел хкин, 21 йис хьанвай Рамин Баязов дзюдодай ва самбодай спортдин мастер я. Агалкьунар ада идалай виликни­ къазанмишнава. Кьилди къачуртIа, ада дзюдодай  Россиядин кIвенкIвечивал патал акъажунра, Россиядин Кубок патал­ акъажунра буьруьнждин медалар къазанмишна. Ам Вириросссиядин ва международный турниррин гъалибчи ва призёр я. Мегьарамдхуьре кардик квай М. Мегьамеджанован тIварунихъ галай 2-нумрадин ДЮСШ-дин школада тренер-муал­лим Садир Айвазован гъилик вичин ус­тад­вал хкажзавай жегьил акъажунра Став­рополдин патай экъечIзава. 

Рагнеда  Рамалданова