Са тIимил йикъар идалай вилик Башкириядин меркез Уфада 20 йисал къведалди яшара авай жегьилрин арада Россиядин кIвенкIвечивал патал грэпплингдай акъажунар кьиле фена. Ана уьлкведин 63-далай виниз регионрай атанвай 1500-далай гзаф спортсменри иштиракна. Чи ватанэгьли, вичин ери-бине СтIал Сулейманан райондин Агъа СтIалдилай тир Насрулагь Насрулаева 66 кг-дин заланвал авайбурун арада кимоно алаз бягьс чIугунин (Gi) жуьредай къизилдин медаль къазанмишна.
Къейд авун лазим я хьи, мукьвара Бакуда спортдин грэпплингдай кьиле фидай дуьньядин чемпионатда иштиракдай спортсменрин тIварар майдандиз акъуддай и акъажунар къизгъиндаказ кьиле фена. Н. Насрулаева вири бягьсер инанмишвилелди гъалибвилер къазанмишуналди акьалтIарна, дуьньядин чемпионатдиз фидайбурун жергеда вичиз чка кьуна. Гила чна Бакудай шад хабарар агакьуник кIевелай умуд кутунва.
РикIел хкин: Россиядин кIвенкIвечивал патал акъажунра кьунвай 1-чка им чи ватанэгьлидин сифтегьан чIехи агалкьун туш. Республикадин хьиз, уьлкведин дережадин акъажунрани ада идалай виликни иштиракнай, приздин чкаярни кьунай.
Рагнеда Рамалданова
