Гад — ял ядай ва рухсатрин вахт — алукьнава. Гзафбур, чпин кIвалер ва квартираяр ичIидаказ туна, масанрихъ физва. Абуру фикирзавайвал, и къайдада, гьа жергедай яз, коммунальный къуллугърай гузвай гьакъини кьенят жезва.
«Амма рухсатрин вахт коммунальный къуллугърай, кьилди къачуртIа, ишлемишнавай газдин гьакъи гун тийидай вахт яз кьабулун дуьз туш. Рухсатдиз гьазур жедалди вилик ишлемишнавай газдин буржар гунин къайгъу чIугу. Ката-калтугда авай ихьтин вахтунда и кар «Зи газ» ва «Газ Онлайн» приложенийрин, гьакIни тIебии газдин таъминчи тир «Газпром межрегионгаз Махачкъала» компаниядин сайтда авай «Абонентдин хсуси кабинетдин» куьмекдалди авуртIа, виридалайни къулай я», — тагькимарзава «Газпром межрегионгаз Махачкала» ООО-дин гендиректордин СМИ-рихъ ва жемиятдихъ галаз алакъайрай меслятчи Сапият Акаевади.
Ада гъавурда твазвайвал, «Хсуси кабинетда» са сеферда регистрация авуналди (и кар асантдаказ ийиз жезва, кIанзавайди анжах лицевой счетдин нумра я), куьн мад кассайрихъ учирра акъвазуниз ва жуван вахтни, такьатарни харж авуниз мажбур жедач. «Хсуси кабинетдин» куьмекдалди гьакъи гунин мад са къулайвал ам я хьи, квез ишлемишнавай газдин гьакъиндай вири гьахъ-гьисабар суткадин гьи вахтунда хьайитIани ийидай мумкинвал ава — и къуллугъдин куьмекдалди квевай гьи йисуз ва я гьи вацра гьикьван пул ганватIа, куь тIварцIихъ (счетдихъ) буржар галани-галачни чириз, счетчикдин эхиримжи делилар агакьариз жеда.
Идарадин векилди гьакIни къейдзавайвал, яшайишдинни коммунальный къуллугърай гьакъи авансдин къайдадани, яни лазим тирдалай гзаф кьадарда авазни гуз жеда. Алукьзавай июлдилай коммунальный къуллугърай тарифар хейлин хкаж жезвайди фикирда кьурла, ихьтин серенжемди, дугъриданни, харжияр кьенятдай (куьгьне тарифрай гьахъ-гьисабар авуналди) мумкинвал гузва.
Рухсатдиз фидайла, мад са месэла фикирдай акъудна кIандач — ичIизвай вахтунда кIвалин хатасузвал. «Газпром межрегионгаз Махачкъалади» тагькимарзава: гатун вахт секиндаказ ва хатасуздаказ акъудун патал асант, гьа са вахтунда иллаки важиблу къайдайрал амал авуна кIанда. Гатуз масаниз фидайла, кIвал ва я квартира газдалди таъминарзавай кран (тадаракдал алайдини, адал къведалди эцигнавайдини) агала.
«Эгер куьн гатун вахтунда хуьруьз хъфизватIа, дачадиз физватIа ва ана газ ишлемишзавай тадаракар аватIа, сифтени-сифте абурун гьал ахтармиша. Эгер газ ахъа хьунай, я тахьайтIа, маса рекьерай са жизви кьванни шак физватIа, райондин газдин рекьяй къуллугъзавай пешекарриз, тежрибалу газовикриз идакай хабар це. ГьикI лагьайтIа, куьн кIвале авачир вахтунда пичинихъ (чанахъдихъ) газдин шланг галкIурнавай чкаяр буш хьун, и шлангар кьурун ва зайиф хьун мумкин я. Жезмай кьван дикъетлу хьухь, кIвале газдин ни авани-авачни ахтармиша!», — меслятзава С.Акаевади.
Газдихъ галаз алакъалу аварийрин къуллугъриз, 104 ва 112 нумрайрай зенг авуна, эвер гуз жеда. ГьакIни республикадин мулкунал газ ишлемишзавай муьштерийривай рикIик квай вири суалриз жавабар, 8-800-200-98-04 нумрадай «Контакт-центрадиз» зенг авуна, жагъуриз жеда.
Жасмина Саидова
