Гьейранвалдай сес
Алай йисан сентябрдиз НТВ каналди, международный информациядин агентстводи ва Спутник радиоди тешкилнавай музыкадин «Ты супер! 10 лет спустя» шоудиз майданар ачухна. Идан макьсад вуч тир лагьайтIа, цIуд йисуз шоуда иштиракай ва кIвенкIвечи чкаяр кьур 48 манидардиз мад эвер хъувуна ва абурун арада сад лагьай чка кьун патал халисан женг малумарна. И манидаррин арада 2017 ва 2019-йисариз «Ты супер» шабагьдиз лайихлу хьайи чи лезги руш Карина Исмаиловани авай.
Къейд авун лазим я хьи, шоудин тешкилатчийрин патай хъсан шабагьар агакьай Каринади Москвадай кIвалер къачуна, Гнесинрин тIварунихъ галай музыкальный училищедин «Эстрадно-джазовый вокал» отделение куьтягьна. Ада Москвада, Дубайда тIвар-ван авай сегьнейра манияр лагьана. Исятда вичини манияр кхьизва, музыкадин колледжда вокалдай тарсар гузва. Жуьреба-жуьре мярекатра, конкурсра иштиракзава.
«Ты супер! 10 лет спустя» шоудин ярумчух финалдиз экъечIзавайбурун арада акъажунар сентябрдиз кьиле фена. Карина сегьнедиз «ЧIулав варз» мани гваз экъечIна. Зал ва жюридин членар Игорь Крутой, Диана Арбенина, Ёлка ва Александр Панайотов ял кьуна амукьна. Лезги руша мани тамамарзавай жуьре, адан сесинин гьунар акур абурувай, мани куьтягьайла, чеб хуьз алакьнач: вири кIвачел къарагъна, Ёлкади гьатта кьуьлна, Крутой рушаз гьейранвилелди килигна…
Къиметар гудайла, Крутоя лагьай гафар гьакъикъатдихъ галаз кьазвайбур тир: «Аллагьди ганвай ви сес анжах гьейранвалдайди я. Ам хуьх ва музыкадин рекьелай масанихъ алатмир…»
Карина ярумчух финалдиз акъатна. 18-октябрдиз шоудин финалдиз экъечIзавайбурун акъажунар кьиле фена. Муьжуьд касдикай виридалайни эхирдай сегьнедиз атай Каринади «Жегьре рангунин фламинго» мани акьван еке устадвилелди лагьана хьи, жюридин членри чи рушан тIварунихъ анжах хуш келимаяр лагьана. Муьжуьд касдикай кьуд финалдиз акъатун мумкин тир. Ингье жюриди абурун тIварар кьадай вахтни атана. Бажарагълу манидар, пешекар Ёлкадал нубат атайла, ада Карина Исмаиловадин тIвар кьуна.
Чи рушахъ галаз финалдиз Валерия Адлейба (Абхазия), Евгения Ким (Саратов), Роман Дружинин (Красноярский край) акъатнава. Гьелбетда, кьудни алакьунар, хъсан сесер авайбур я. Исятда абур 1-ноябрдиз финалда сад лагьай чка кьун патал гьазур жезва. Гуьзел сес авай чи викIегь рушаз гъалибвал къазанмишдай къуватар хьурай!
Абад Азадов