РД-дин хуьруьн майишатдин ва недай суьрсетдин министерстводи 2025-йисуз государстводи  техил ахтармишунин кIвалах тухузвайдакай хабар гузва. Адет яз, республикада техил кIва­тIу­нин кампания къуьлуьн бегьер  вахчунилай башламишза­ва. Ам лагьайтIа, алай йисалай башла­мишна, государстводин гуьзчи­вилик жеда. Чи регионда­ и кIва­лахдай жавабдарвал «ВНИИКР» ФГБУ-дин Кьиблепатан фи­ли­ал­дин Дагъустан Рес­пуб­ли­ка­да авай отделдин хиве тунва.

Государстводин гуьзчивилин асул макьсад хуьруьн майишатдин суьрсет гьасилзавайбурув техилдин еридиз ва ам гьасилнавай чкадиз талукь гьакъикъи делилар агакьарун я лагьайтIа жеда. Гуьзчивилин сергьятра аваз, къуьлуьн ламувал, михьивал, адак зиянкар гьашаратар ва маса зирзибил квани, квачни, клейковинадин ва белокдин кьадар ва са жерге маса терефар ахтармишда.

Къейдзавайвал, къуьлуьн ери ам гьялдалди ахтармишда. Ида гьахълу делилар гун лазим я. Санлай къачурла, государстводин мониторинг кьиле тухунин нетижада уьлкведин мулкунал ризкьидин запасар авай гьакъикъи гьал чирда. Хуьруьн майишатдин карханаяр патални им хийирлу кар жеда.

Дагъустандин мулкунал гуьзчивилин серенжемар 2025-йисан июль-август варцара республикадин 17 муниципалитетда кьиле фида. Санлай къачурла  республикада 82,28 агъзур тонн хъуьтуьл сор­тунин ери чирда. И кар патал 143 проба  къачуда  ва  жуьреба-жуь­­ре 2717 ахтармишун кьи­ле тухуда.

Хуьруьн майишатдин суьрсет гьасилзавайбур патал 2025-йисан июль-ав­густ варцара кьиле тухудай ахтармишунар пулсузбур жеда. И вахт акьал­тIайдалай кьулухъ и къуллугъ гьа­къидихъ тамамарда. Санлай къачурла, ахтармишунар кьиле тухузвай пешекарри асул фикир къуьлуьн хатасузвилиз гуда.

РД-дин хуьруьн майишатдин ва недай суьрсетдин министерст­во­ди республикадин суьрсет гьасилзавайбуруз государстводин къуь­луьн мониторингда иштираку­низ ва арадал атанвай делилар гьа­силзавай суьрсетдин ери хкажун­ патал ишлемишуниз  эвер гузва.

Амина Муслимова