15-июлдиз Ахцегь райондин Чеперин хуьре дагъвийрин азадвилин женгерин кьиле акъвазай кьегьал хва Гьажи Давуд рикIел хкуниз талукьарнавай мярекат кьиле фена. Ам Гьажи Давудан тIварцIихъ галай фондуни (председатель – Нариман Фаталиев) тешкилнавай.

Мярекатда Ахцегь, Докъузпара, Мегьарамдхуьруьн, СтIал Сулейманан, Дербент, Табасаран районрай атанвай ва патарилай хтанвай мугьманри – мискIинрин имамри, жемиятдин деятелри, муаллимри, тарихдал, медениятдал рикI алай ватанэгьлийри иштиракна. Абурун арада Ахцегь райондин депутатрин Собранидин председатель Гьажимурад Парпачев, Свердловскдин областдай хтанвай Расим Закиржяев, ФЛНКА-дин векил Жалалдин Абдуразакьов, Пирали Пиралиев, Ахцегьрин хуьруьн жуьмя-мискIиндин имам Абдулгьашим-гьажи ва масабур авай

Мярекатдал рахайбуру Гьажи Давудан кьегьалвилерикай, тарихдин вилик адахъ авай лайихлувилерикай, ватанпересвилин тербиядикай ихтилатар авуна ва ихьтин серенжемар мукьвал-мукьвал тешкилун важиблу тирди къейдна.

Мярекатдин сергьятра аваз гьакIни аялрин арада виридалайни хъсандиз Къуръан кIелунай конкурсни тухвана. Гъалибчийриз пишкешар гана.

Са шакни алачиз, чи хайи районра, хуьрера, чIал, тарих, адетар хуьниз ва вилик тухуниз, кьегьалрин тIварар эбеди авуниз талукьарнавай мярекатар гьикьван пара хьайитIа, гьакьван хъсан я. Сифте нубатда – акьалтзавай несилар патал. Гьикьван абур руьгьдин ивирриз мукьва хьайитIа, гьакьван абурун ватанпересвални мягькем жеда.

Аферин Гьажи Давудан экуь къаматдиз бахшнавай мярекат тешкилайбуруз!