Дагъустандин МФЦ-ри кIва­лер газдалди таъминаруниз талукь икь­рарар кутIунун ва лицевой счетар ачухун патал арзаяр кьабулиз башламишнава.­ Талукь тир икьрардал РД-дин МФЦ-ди ва «Газпром межрегионгаз Махачкъала» ООО-ди къулар чIугунва. «Газпром межрегионгаз Махачкъала» компаниядин гендиректор Ризван Мурадова хабар гайивал, арзадиз килигдай вини кьилин вахт 30 югъ жеда. Адан гафаралди,  документар МФЦ-дин вири фи­лиалра  кьабулда, ида  къуллугъ тамамарунин кIвалах къулайди ва муьштерияр патал алцифди авун лазим я.

Малум хьайивал, гьар йисуз Да­­гъус­танда юкьван гьисабдалди­ 10  агъзур агьалиди газдалди таъ­минаруниз талукь икьрарар ку­тIун­зава. «И къуллугъ тамамарун­ патал неинки чи идарайриз, гьакIни республикада гегьеншдаказ ачухнавай «Зи документар» центрайриз арзаяр гудай мумкинвал ачухун газдалди таъминарунин месэ­ла гья­лу­нин карда агьалийриз­ еке куьмек жеда»,- лагьана Р.Мура­до­ва.

Икьрар кутIунун ва лицевой­ счет ачухун патал МФЦ-див са жер­ге документар агакьарна кIан­да­. Гьихьтин документар лазим ятIа, тамамдаказ  «Газпром межрегионгаз Махачкъала» тешкилатдин официальный сайтда къалурнава.

РД-дин рекъемрин жигьетдай виликди финин министр Юрий Гьамза­то­ва малумарайвал, кьве идаради алакъа аваз кIвалахуни абонентар патал и месэла хейлин кьезиларда. «МФЦ-дин пешекарри арза туькIуьриз куьмекда, агакьарзавай делилрин гьа­къикъивал ахтармишда. Идалай гуьгъуьниз документар, абонентдин иштираквал авачиз, газдалди таъминарзавай идарадив агакьарда», — лагьана ада.

Къейд ийин: Дагъустандин мул­кунал МФЦ-дин 58 идара кардик ква.

Амина Муслимова