Дагъустан Республикадин тамарин майишатдин рекьяй комитетди, цӀаяр кьур дуьшуьшар фад кьатӀудай махсус камераяр кардик кутуналди, гуьзчивал авунин къурулуш гегьеншарун пландик кутунва.
Идакай РД-дин тамарин майишатдин рекьяй комитетдин кьилин заместитель Алимурат Муртузалиева «Дагъустан» РИА-да кьиле фейи пресс-конференциядал малумарна. Адан гафаралди, гуьзчивалдай системаяр тайинарунин ва абур фад жаваб гудай сад тир къурулушдик кутунин кIвалах 2027-йисалди акьалтӀарун планламишнава.
Идалайни гъейри, идаради алатай йисуз 12 дрон маса къачуна. Алай вахтунда абур тамара цIаяр кьунал гуьзчивалзавай инспекторри активнидаказ ишлемишзава. А. Муртузалиева хабар гайивал, алай йисуз мад са аппарат маса къачунва.
«Дронар ишлемишуни чи кӀвалах хейлин кьезиларнава. Гзаф четин чкайрив чилел гуьзчивалзавай патрулдилай гьамиша фад агакьариз жезвач. Я тахьайтIа, цIай кьур чка ам гегьеншдаказ куз башламишдалди, тади гьалда дуьздал акъудиз агакьзавачир. Гьа са вахтунда пилот галачиз лув гудай тадаракдилай гум акъатзавай чка гьатта са шумуд декьикьа алатайдалай кьулухъ тайинариз алакьзава», – къейдна Муртузалиева.
Гьа са вахтунда идарадин векилди къейд авурвал, Дагъустандин тамарин фонд тамамдаказ гуьзчивилик хуьн патал 13 дрон гьелелиг бес жезвач.
Саида Мурадова
