Чи ватанэгьлияр – гьар сана

Москвадин областдин Видное ше­гьер­да яшамиш хьайи 43 йисакай 30 йис ада муаллимвилин рекьиз бахшнава­. Гьикаятчивилин алакьунар авай ада гуь­гъуьн­лай романар, гьикаяяр кхьена, гилани кхьизва.

Ихтилат чна вичин агалкьунрикайни яратмишунрикай са шумудра кхьей Теяра Велиметовадикай я. АР-дин КцIар райондин Пирал хуьряй тир Т.Велиметова урус чIалал кхьенвай «Долгая любовь моя», «Уз­ники Азазеля», «Розы без шипов»­, «По­зывной Ассоль» ва маса эсеррин автор­ я.

Сифтегьан эсердай ам «Есенинан къизилдин медаль» шабагьдиз лайихлу хьана ва гуьгъуьнлай Россиядин писател­рин союздиз кьабулна. Художественный эдебиятдин эсеррилай гъейри, ада экологиядин месэлайриз талукь «Земля у нас одна» ктабни кхьена.

Писателди, алай муракаб девирдин месэлайривай къерех тахьана, акьалтзавай несилдиз ватанпересвилин, инсанпересвилин тербия гудай, чешне къалурдай эсерар теснифун важиблу яз гьисабзава. Мисал яз, «Позывной Ассоль» гьикаяда ада къенин юкъуз кьиле физвай вакъиаяр къалурзава, кьилди къачуртIа, ина гуманитарный куьмек гваз женгинин гьерекатар кьиле физвай мулкариз физвай волонтер дишегьлидикай ихтилат­зава.

Теяра Велиметова санал акъвазиз течидай, датIана гьерекатдик квай инсан я. Алай вахтунда ада «Россиядин дишегьлийрин союз» тешкилатда иштиракзава.

«За виридалай хъсан шабагьрикай «Волонтердиз – кьетIен лайихлувилерай»­ медаль яз гьисабзава», – лугьузва писателди.

Къейд ийин, Теяра Велиметова и мукь­вара Дагъустандиз хтанвай. Чаз ихтилат авурвал, алай вахтунда ада вичин­ аялвилин чIаварихъ галаз алакъалу «Кув­шин воды из Пирала» эсердин винел кIвалахзава.  Чаз адахъ яратмишунра еке агалкьунар хьана кIанзава.  

С. Салимов