22-июлдиз Дербент шегьерда «Ковровый код Дагестана» лишандик кваз гамарин чIехи фестиваль кьиле фена. Лишанлу кар ам хьана хьи, мярекат Керим Мамедбегован тIварцIихъ галай куьчеда тешкилнавай. Виликдай ина неинки са Дагъустандиз машгьур хьайи шегьердин гамарин зурба базар авай.

Фестиваль устIарринни милли адетрин халис сувариз элкъвена. Дербент, Дагъустандин Огни шегьеррай, Агъул, Ахцегь, Дербент, Та­басаран, СтIал Сулейманан, Хив районрай атанвай гамарин устадри фестивалдиз чпин гъиликай хкатнавай виридалайни иер, чIагай гамар, халичаяр, сумагар гъанвай. Гуя акI тир хьи, гьар са гам тикрар тежер, гьакьван надир, успагьи чешме я. Мугьманриз Дагъустандин гамарин тарихдихъ галаз мукьувай таниш жедай мумкинвал авай. Абур патал гьакIни квакварин сирер чидай дагъви дишегьлийри гамар хрунай мастер-классар къалурна.

Мярекат РД-дин медениятдин министерстводи, Дербентдин музей-заповедникди, Республикадин халкьдин яратмишунрин кIвали тешкилнавай. Гамарин суварик атай гьуьрметлу мугьманрин арада къадим шегьердин мэр Ханлар Пашабегов, музейдин – заповедникдин директор Велиюлла Фаталиев, Дербентдин депутатрин Соб­ранидин председатель Гьасан Мирзоев, музейдин илимдин кьилин къуллугъчи Гьуьсейнбала Гьуьсейнов ва масабур авай.

Вичин рахунра Велиюлла Фаталиева къейд авурвал, ихьтин мярекатар тухунихъ Дагъустандин милли ирс хуьнин жигьетдай еке метлеб ава. Адан фикирдалди, гамарин фестивалди Кьиблепатан Дагъустандин къадим сеняткарвилерикай сад тир гамар хрунин сеняткарвилел чан аламайди, ам чпин пешедиз вафалу устадри хуьзвайди, вилик тухузвади къалурна.

Гамарин фестивалдин сергьятра аваз, Да­гъус­тандин халкьарин жуьреба-жуьре сеняткарвилериз талукьарнавай выставкаяр, мекераяр, мастер-классар кардик кутунвай. Мугьманриз тIямлу аш недай, чай хъвадай, халкьдин милли алатар язавай устIарри, фольклордин коллективри тамамарзавай макьамрихъ, манийрихъ яб акалдай мумкинвал авай.

Фестивалдиз атанвайбур виридалайни гзаф 15 миллион манатдай маса гузвай чIехи гамуни гьейранарна. Ам кьве йисан къене 20 дишегьлиди храна. Суьретчиди янавай шикил хьиз аквазвай и гамунай Дербент шегьердин къадим къеле аквазвай. Гам хранвай дишегьлийри кIвалахзавай карханадин директор Сабир Шихова къейд авурвал, ихьтин кIвалахриз чи йикъара искусстводин надир яратмишунриз хьиз къимет гузва.

«Чна акьалтIай четин кIвалах тамамарнава. Им халис искусство я. Къимет кьве миллионни, пуд миллионни хьун мумкин я. Амма чи фикирдалди, 15 миллион и гамуниз кутугай къимет я», – гъавурда туна С.Шихова.

Ада къейд авурвал, республикада гамарин­ сеняткарвал яваш-яваш арадай акъатзава. Ви­лик­­дай тек са Дербентда гамар хразвайбурун кьа­дар 12 агъзурдав агакьзавай, алай вахтунда амайди вини кьил са виш устIар я.

Сабир Шихов гьахълу я. Виликдай Кьиблепатан Дагъустандин гзаф хуьрера махсус фабрикаяр авай. Чпихъ мумкинвилер авай карчийри, меценатри гамарин фабрикайрал чан хкайтIа, анжах и дуьшуьшда и надир сеняткарвал хуьз алакьда. 

Чи мухбир