22-мартдиз ДИРО-дин бинедаллаз республикадин районрин ва шегьеррин 9-11-класс­ра кIелзавай аялрин арада хайи чIа­ларай олимпиададин респуб­ликадин пай кьиле фена. Мярекатдин тешкилатчияр РД-дин об­разованидин ва илимдин министерство ва «Дагъустандин А.А.Тахо-Годидин тIварунихъ га­­лай илимдинни ахтармишунрин институт» ГБУ я.

Олимпиададин республикадин пай аваррин, даргийрин­, къумукьрин, лезгийрин, лакрин ва табасаранрин секцийри­кай ибарат я. Санлай къачурла,­ олимпиададин республикадин дережадин паюна иштиракун па­тал РД-дин 52 муниципалитетдай 213 арза атанвай, 162 ученикди иштиракна.

11-классра кIелзавай аялрин арада лезги чIалай олимпиададин нетижада Ахцегь райондин Къурукаларин юкьван мектебдин ученица Эльдарова Ханум Гьайдаровна гъалиб хьана. Чаз малум хьайивал, адахъ  ДГУ-дин филологиядин факультетдин урус ва Дагъус­тандин чIаларин отделенидик экечIдай фикир ава.

Чна Ханумаз гъалибвал мубаракзава. Къуй адан фикирар кьилиз акъатрай, чирвилерин рекье мадни еке агалкьунар ва цIийи гъалибвилер хьурай!

Чи мухбир