Чаз и йикъара хабар хьайивал, 11-августдиз Мегьарамдхуьруьн райондин Хтун-Къазмайрин хуьруьн школадин директор Фейзудин Абидинович рагьметдиз фена.
Исмаилов Фейзудин 1953-йисан 10-апрелдиз Мегьарамдхуьруьн райондин Хтун-Къазмайрал дидедиз хьана. 1960-йисуз ам сифтегьан школадиз фена, 1970-йисуз Тагьирхуьруьн-Къазмайрин юкьван школа акьалтIарна. Советрин Армияда къуллугъайдалай кьулухъ кьве йисуз «Свердловский» совхозда кIвалахна. Муаллимвилин пеше къачунин фикирдал атай Ф. Исмаилов 1975-йисуз Хасавюртдин З.Н. Батырмурзаеван тIварунихъ галай педучилищедик экечIна. Училище акьалтIарайла хуьруьз хтана ва Хтун-Къазмайрин мектебда физкультурадин муаллим яз кIвалахна. Са кьадар вахтунилай чирвилерин рехъ давамардай фикирдал атай ам Дагъустандин госпединститутдин тарихдин факультетдик заочнидаказ экечIна. Вуз акьалтIарай ада вичи кIвалахзавай школада тарихдин тарсарни гуз башламишна. 1995-2003 йисара Хтун-Къазмайрин асул школада директордин заместитель яз кIвалахна. 2012-йисан августдиз директорвиле тайинарна. Гьакъисагъ зегьметдай ва пешедин рекьяй агалкьунрай ам 2018-йисуз Россиядин образованидин гьуьрметлу къуллугъчи лагьай тIварцIиз лайихлу хьана.
КIвалахдин рекьяй юлдашриз, амадагриз, жемятдиз Фейзудин Абидинович кар алакьдай, масадан дердийрикай хабар кьадай, жавабдарвал гьиссдай, гьахълувал кIандай, хъсан къилихрин намуслу инсан яз чидай.
Мегьарамдхуьруьн райондин образованидин управлениди, райондин педагогрин профсоюздин тешкилатди, райондин школайрин директорри, гьакIни Тагьирхуьруьн-Къазмайрин ва Хтун-Къазмайрин школайрин коллективри Фейзудин Абидиновичан багърийриз, мукьва-кьилийриз башсагълугъвал гузва. Муаллимдин экуь къамат чи рикIера гьамишалугъ яз амукьда.
