Малум тирвал, алай йисуз лезгийрин зурба шаир, Дагъустандин классик, лезги чlалан литературадин чlала бине эцигай Етим Эмин дидедиз хьайидалай инихъ 180 йис тамам жезва.

Шаирдин гьуьрметдай 2018-йис Сулейман-Стальский районда Етим Эминан йис яз малумарнава. Адан сергьятра аваз райондин ктабханайра, хуьрера, мектебра юбилярдин ятармишунриз, уьмуьрдиз талукьарнавай са жерге мярекатар кьиле физва.

И йикъара Сардархуьруьн ктабханада «Етим Эмин – шииратдин буба» лишандик кваз эдебиятдин межлис кьиле фена. Кlелдайбурун залда Етим Эминаз, адан яратмишунриз талукь стендар, ктабрин выставка тешкилнавай.

Мярекат ктабханадин заведующий Лаура Шабановади кьиле тухвана. Ада жегьил кlелчияр Етим Эминан яратмишунринни уьмуьрдихъ рекьихъ галаз гегьеншдиз танишарна. Аялрин патай иллаки 5-6-классра кlелзавайбуру активвал къалурна. Абуру шаирдин шиирар фасагьатдаказ, устаддаказ кlелна, адан чlалариз кхьенвай маниярни тамамарна.

Къейд ийин, Етим Эминан 180 йисаз талукь мярекатар райондин муькуь хуьрерани икьван чlавалди кьиле фенва ва абур райондин сергьятра йисан эхирдалди давамни жеда.

 

«Лезги газет»