Наркотикри инсаният терг авунал гъизвайди фикирда кьуна, дуьньяда, Россияда, гьа жергедай яз Дагъустан Республикадани ара датIана женг чIугвазва. ИкI СМИ-ра мукьвал-мукьвал наркоманиядикай авай зияндикай хабар гузва, къайдаяр хуьдай органри а зегьер чукIурунал машгъул жезвай ксар дуьздал акъудзава, судри наркотикралди алверзавайбур азадвиликай магьрумзава. Амма эсер жезвач хьи, жезвач!
Алай йисан 31-январдиз полициядин къуллугъчийри Махачкъалада Акушинскийдин тIварунихъ галай куьчедай отделдиз хкай 28 йиса авай агьалидивай, ахтармишайла, 0,07 грамм “спайс” жагъана. Адалай РФ-дин УК-дин 228-статьядин 1-паюнин бинедаллаз (наркотикар законсуз хуьн ва санай масаниз тухун) уголовный дело къарагъарнава. Шак физвайдавай вахчунвай наркотикдин кьадар, аквазвайвал, тIимил ятIани, законда адаз 3 йисалди кар къвезвайди къалурнава.
* * *
Гьа и юкъуз Мегьарамдхуьруьн райондин 49 йиса авай агьалидин кIваляй, виликдай къарагъарнавай уголовный делодин бинедаллаз ахтармишунар тухудайла, 116,25 грамм “марихуана” жагъана.
Шак физвайдаз, авунвай тахсиркарвилиз килигна, РФ-дин УК-дин 228-статьядин 3-паюнин бинедаллаз 3 йисалай 10 йисал къведалди кар гун мумкин я.
* * *
2018-йисан 1-февралдиз Махачкъалада Шамилан тIварунихъ галай куьчеда авай са кIвалерин патав Дагъустан Республикадин МВД-дин наркотикар санай масаниз тухунал, абур маса гунал гуьзчивалдай управленидин къуллугъчийриз 35 йиса авай шегьерэгьлиди 21 йисавай жегьилдиз 0,64 грамм “трамал” (инсандин бейнидиз гзаф таъсирдай дарман) маса гудайла акуна.
Шак физвайди кьуна ва полициядин отделдиз хкана. Адалай РФ-дин УК-дин 234-статьядин 1-паюнин бинедаллаз (инсандин бедендиз гзаф таъсирдай ва агъуламишдай шейэр маса гун) уголовный дело къарагъарнава ва ам маса тахсиркарвилерик шерик яни, тушни ахтармишзава. Уголовный делодай ахтармишунар куьтягьайла, судди адаз 3 йисал къведалди кар гун мумкин я.
* * *
4-февралдиз Хасавюрт шегьерда тади гьалда гел жагъурдай серенжемар кьиле тухудайла, полицейскийри отделдиз хкай Чечен Республикадин Урус-Мартан шегьердин 31 йиса авай агьалидивай, ахтармишайла, 37,61 грамм “марихуана” жагъана. Адалайни РФ-дин УК-дин 228-статьядин 1-паюнин бинедаллаз уголовный дело къарагъарнава.
Гьазурайди — Нурдин Рашидов
