РФ-дин хуьруьн майишатдин ва недай суьрсетдин министерстводи ерисуз ва къалп затlар арадал гъизвай ксар патал жермеяр артухарда. Регьимсузвал къалурзавай идарайривай шей гьасилунин ихтиярар гузвай лицензияни вахтуналди яз къакъудда. И гьакъиндай РФ-дин хуьруьн майишатдин ва недай суьрсетдин министр Александр Ткачева малумарна.

«ГОСТ-дин, маркаяр ягъунин ва икl маса месэлайрал дуьз амал тавуналди и ва я маса метягьар гьасилзавайбуруз жермеяр артухарун, абурувай шей гьасилуниз талукь лицензияни вахчун патал чна исятда къанунрик са жерге дегишвилер кутуник кьил кутазва», — лагьана Ткачева хуьруьн майишатдин затlар гьисалзавайбурун Вирироссиядин форумдал.

Ада къейднавайвал, алай вахтунда базарра инсанар алцурарзавайбуруз кепекрин жермейрихъай кичlезвач. Гьавиляй жермеяр кьвед ва пуд сеферда артухарда. Ери авачир затl гьасилзавай идараяр, кlвалах акъвазарна, са фикир-фагьум авун патал, 90 йикъан муддатда лицензиядикайни магьрумарда. Инсанри экологиядин жигьетдай михьи, ерилу ва хъсан суьрсетар гуьзетзава.

Министрди къецепатан уьлквейра къайдаяр чlурна суьрсетар арадал гъун уголовный тахсиркарвал яз гьисабзавайдакайни лагьана.

Чи мухбир