14-майдиз акъатай «Лезги газетдин» нумрада Абдулафис Исмаилован «Пул вири я, анжах хайи Ватан туш» макъала чапнавай. Ана лезгийрин тIвар-ван авай шаир, таржумачи, писатель, литературовед Азиз Мирзебегован уьмуьрдикай, яратмишунрикай гегьеншдиз кхьенвай ва ада милли литература вилик тухуник кутазвай паюниз дуьзгуьн къимет ганвай.
Хейлин йисара Азиз Мирзебегова яратмишунин рекье гьакъисагъвилелди зегьмет чIугвазва. Лезгийрин СтIал Сулейманан тIварунихъ галай муздрамтеатрда кIвалахзавай ада хейлин пьесаяр лезги чIалаз элкъуьрнава. Драматургиядин кьетIенвилерин гъавурда хъсандиз авай писателди маса уьлквейрин авторрин эсерар чи тамашачияр гъавурда акьадайвал сегьнедал гъидайвал ийизва. Идалай гъейри, ада Россиядин, РагъэкъечIдай патан ва гьакI Европадин хейлин уьлквейрин машгьур шаиррин чIалар лезги чIалаз таржума авунва. Адан гъиликай лезги шаиррин, писателрин, драматургрин, актеррин уьмуьрдиз, яратмишунриз талукьарнавай ктабар хкатнава.
Азиз Мирзебегован литературадин яратмишунар са шумуд терефдинбур ятIани, адахъ вичин кьилдинвал ава. Ам вичин рикIин гьарайдин гуьгъуьна аваз физва. Лезги шииратдин диб эцигай классикар тир Кьуьчхуьр Саидан, Етим Эминан, СтIал Сулейманан яратмишунривай яргъаз тахьана, ада шииратда вичин хсуси рехъ кутунва. КIелзавайбур фадлай адан шииррихъ, прозадихъ, публицистикадихъ, таржума авунвай эсеррихъ галаз таниш я. Адан шиирра мухаммас, мурабба, мусамман, мусаддас, гъезелар, герайлияр, рубаияр, риваятар, балладаяр, элегияр, сонетар ва маса жанраяр гьалтзава.
А. Исмаилова вичин макъалада Азиз Мирзебеговаз Дагъустандин халкьдин шаир лагьай тIвар гун теклифнавай. Зунни адахъ галаз рейсад я, гьикI хьи, Азиз Мирзебегован яратмишунар чи милли культурадин ва литературадин къакъудиз тежер бегьерлу паюниз фадлай элкъвенва.
Мурад Саид,
шаир, писатель, таржумачи, композитор,
Россиядин писателрин союздин член
