Мартдин вацра Дагъустанда емишрин алай аямдин, санлай къачурла, 800 миллион манатдин къимет авай гьамбарханадин сифте нубатдин пай кардик кутун планламишнава, хабар гузва РД-дин хуьруьн майишатдин ва недай суьрсетдин министерстводи.
Проектдин теклиф гайиди «Багъ» КФХ я. Гьамбархана Мегьарамдхуьруьн райондин Чепелрин хуьруьн патав гегьенш майданра уьмуьрдиз кечирмишзавай чIехи проектдин сергьятра аваз эцигзава. Ина 2 гектардин майдан кьунвай цин гьамбарханани туькIуьрнава.
«Емишрин гьамбарханадин сад лагьай нубатдин паюник 5 агъзур тонн суьрсет хуьз жедай объект акатзава. Кьвед лагьай паюна адан гужлувал 10 агъзур тонндив агакьарда», — къейдзава министерстводи.
Проект патал 4 гектар чил чара авуна. Ана гьавадин чимивал датIана гуьзчивилик хуьдай технология ишлемишзавай алай аямдин тадаракар тайинарнава. КФХ «Багъ» 1994-йисуз Дагъустанда арадал гъанва. 2022-йисан нетижайралди, и карханади 90,1 миллион манатдин суьрсет маса гана, 35,5 миллион манатдин хийир къачуна.
«Лезги газет»
