Эминхуьруьнви Хазран Кьа­сумова журналиствилин­ ва яратмишунрин рекье бе­гьер­лу­даказ кIвалахиз гзаф йисар я. «Куьредин хабарар» газетдин­ тежрибалу журналистрикай ва «Лезги газетдин» активный мухбиррикай сад тир Хазран Кьасумова и йикъара медениятдин  «Куьредин ярар» центрада вичин цIуд лагьай «Эминхуьруьн кимел» ктаб акъудна. Ктабда авторди­ эхиримжи йисара кхьенвай сатирадинни юмордин гьикаяяр­ гьатнава. Абур асул гьисабдай Эминхуьруьхъ, ана яшамиш жез­вай инсанрихъ галаз алакъа­лу я. Гьавиляй ктабдиз «Эминхуьруьн кимел» тIварни ганва.

Уьмуьр вакъиайрив ацIанва, хъуьруьн-зарафат квай ажайиб­ крар, кIвалахар чи хуьрера тIи­мил жезвач. Мумкин я абуруз са бязи ксари фикирни тагун. Амма фадлай яратмишунрин рекье авай Хазран Кьасумова­ ажайиб гьар са кардиз, ван хьайи ихтилатдиз дикъет гузва. Нетижада юмордин гьикая ва я къаравили арадал къвезва.

Ктаб Дагъустандин халкьдин шаир Майрудин Бабаханова кхьенвай «Автордикай куьруь гафунилай» башламиш жезва.

Виликан ктабар хьиз, Хазран Кьасумован «Эминхуьруьн кимел» ктабни кIелзавайбуру хушвилелди кьабулуник чна умуд кутазва. Чаз Хазран Кьасумоваз яратмишунрин рекье мадни еке агалкьунар хьана кIан­зава.

Асият  Мирзалиева