ЦIийи ктабар
Писатель ва шаир Сардар Абил (Межидов Абил Абдурагьманович) эхиримжи йисара эдебиятдин хиле бегьерлувилелди кIвалахзавай авторрикай сад я. Вад томдикай ибарат тир «Кьве дидедин хва» романди ва «Бушлат» повестди адаз иллаки еке машгьурвал гъана.
Мукьвара Махачкъалада, «Мавел» ООО издательствода, Сардар Абилан цIийи ктаб — «Муьфте гелир» повесть чапдай акъатна. ЯцIу жилдер алаз ва 112 чиникай ибарат яз акъатнавай ктабда авторди СССР чкIайдалай кьулухъ чирвилер къачузвай рекьер зайиф, девлет къазанмишдай рекьер жагъурзавайбур гзаф хьайиди къалурзава. Муьфте девлет жагъинни ийида, гьакI, жагъай хьиз, ам квахьни хъийида, тестикьарзава Сардар Абила.
Мукьвара Кьасумхуьруьн телевиденидин студияда и ктабдин презентация кьиле фена. Ана Россиядин журналистрин ва Лезги писателрин союзрин член Хазран Кьасумова, Вини СтIалрин юкьван мектебдин дидед чIалан ва эдебиятдин муаллим, шаир Минаят Муталибовади ва чкадин телевиденидин журналист Мизамудин Магьмудова иштиракна. Абуру Сардар Абилан повестдиз, ана къарагъарнавай месэлайриз хъсан къимет гана. Абуру лагьайвал, алай вахтунда виридалайни тIал алай месэлаяр къарагъарзавай писателрикай сад тир Сардар Абилан повестдихъ акьалтзавай несил тербияламишунин карда еке метлеб ава.
Хазран Кьасумов